Foto: Akorda.kz
Prezident Astanaǵa resmi saparmen kelgen Ulybritaniianyń Syrtqy ister ministri Djeims Kleverlidi qabyldady, dep habarlaidy "Ult aqparat" Aqordanyń resmi saityna silteme jasap.
Kezdesý barysynda saiasi, saýda-ekonomikalyq, investitsiialyq jáne gýmanitarlyq salalardaǵy ekijaqty yntymaqtastyqty odan ári nyǵaitý perspektivalary talqylandy.
Memleket basshysy Ulybritaniia ministrine iltipat bildire otyryp, eki el arasyndaǵy yntymaqtastyqty odan ári nyǵaitý úshin onyń búgingi saparynyń máni zor jáne óńirlik aýqymdaǵy mańyzdy oqiǵa ekenine nazar aýdardy.
– Sizdiń saparyńyz Qazaqstan men Ulybritaniia arasyndaǵy ózara yntymaqtastyqty odan ári nyǵaitýǵa tyń serpin beredi. Men Sizdiń jaqynda Syrtqy ister ministrliginde sóilegen sózińizdi tyńdadym. Onda Ulybritaniianyń syrtqy saiasattaǵy uzaq merzimdi ustanymy qamtyldy jáne shyn máninde, óte mańyzdy máseleler aityldy, – dedi Memleket basshysy.
Qasym-Jomart Toqaev ekijaqty qatynastardyń qarqyndy damyp kele jatqanyn atap ótti.
– Bizdiń yntymaqtastyǵymyz, ásirese, ekonomika jáne saiasi salalarda óte tabysty dep baǵa bergim keledi. Ózara bailanystarymyzdyń oń baǵytyn odan ári ilgeriletý úshin qosymsha kúsh-jiger jumsaýymyz kerek, – dedi Prezident.
Áńgimelesý barysynda Prezident Qasym-Jomart Toqaev Premer-ministr Rishi Sýnaqqa sálemi men izgi tilegin joldady. Sondai-aq Ulybritaniia Úkimetiniń basshysyn elimizge ózine yńǵaily kez kelgen ýaqytta saparmen kelýge shaqyrdy. Bul sapar ekijaqty qatynastardy nyǵaitýǵa baǵyttalǵan birqatar naqty máseleni talqylaýǵa jaqsy múmkindik beretinin atap ótti.
Óz kezeginde Djeims Kleverli Astana men London arasyndaǵy qarym-qatynastardyń qarqyndy damyp kele jatqanyn jetkizdi. Onyń aitýynsha, Ulybritaniia Qazaqstanda júrgizilip jatqan saiasi reformalardy oń baǵalaidy.
– Sizdiń elińiz – aimaqtaǵy negizgi saýda seriktesimiz. Ekonomikalyq ósimge baǵyttalǵan jospardy júzege asyrý maqsatynda birlesip jumys isteý úshin jaqsy múmkindik bar ekenin kórip otyrmyz. Qazaqstanda júzege asyrylyp jatqan salyq salasyndaǵy reformalar baǵdarlamasy ózara tiimdi ekonomikalyq qatynastardy nyǵaitýǵa yqpal etedi dep oilaimyn, – dedi Ulybritaniia ministri.
Sonymen qatar kezdesý barysynda Qasym-Jomart Toqaev pen Djeims Kleverli óńirlik jáne halyqaralyq kún tártibindegi ózekti máseleler jóninde pikir almasty.
