Foto: Akorda.kz
Prezident Qasym-Jomart Toqaev Ulttyq qaýipsizdik komitetiniń tóraǵasy Ermek Saǵymbaevty qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda Memleket basshysy tapsyrmalarynyń oryndalý barysy, vedomstvonyń jyl basynan beri atqarǵan qyzmetiniń negizgi qorytyndysy men aldaǵy kezeńge arnalǵan jospary týraly málimet berildi.
Qasym-Jomart Toqaevqa Ulttyq qaýipsizdik komitetiniń bólimsheleri birqatar lańkestik qylmystyń, sonyń ishinde qoldan jasalǵan jarylǵysh qurylǵyny qoldaný arqyly halyq kóp jinalatyn oryndardyń birinde jasalmaq bolǵan terroristik aktige tosqaýyl qoiylǵany jóninde baiandaldy. Berilgen málimet boiynsha 19 adam qamaýǵa alyndy. Ermek Saǵymbaev Terrorizmge qarsy ortalyq shtabynyń jumysyn úilestirý kezinde terrorlyq qaterlerge qarsy is-áreket sharalaryn jetildirý úshin jattyǵý jiyndary men daiyndyqtar ótkizilgenin habarlady.
Sonymen qatar, shet memleketterdiń arnaýly qyzmetteriniń barlaý áreketterine qarsy is-qimyl operatsiialary júzege asyryldy. Anyqtalǵan birqatar derek boiynsha sotaldy tergeý amaldary júrgizilip jatyr.
Budan bólek, Memleket basshysyna quqyq qorǵaý organdarymen birlese júrgizgen kriminogen jaǵdaidy saýyqtyrý jumystarynyń nátijesi týraly baiandaldy. Biylǵy tórt aida UQK 8 qaýipti uiymdasqan qylmystyq topty quryqtady. Qarý-jaraq pen oq-dári jasaýǵa qatysty 7 jasyryn tseh joiyldy. Zańsyz ainalymnan 268 qarý, 21 granata jáne 30 myńnan astam oq-dári tárkilendi. 16 esirtki laboratoriiasynyń, 11 halyqaralyq jáne 17 óńirlik esirtki kanalynyń jumysy toqtatyldy.
Memlekettik shekarany kúzetý salasynda 6 987 zańbuzýshy ustaldy. Shamamen 2,8 milliard teńge kóleminde valiýta, altyn jáne basqa da taýarlardyń zańsyz tasymaldanýyna jol berilmedi. Qarý men oq-dárilerdi tasymaldaýǵa qatysty 85 árekettiń joly kesildi. Zańsyz kóshi-qon boiynsha 4 arnaǵa tosqaýyl qoiylyp, olardyń 6 uiymdastyrýshysy ustaldy.
Ulttyq qaýipsizdik komitetiniń tehnikalyq bólimsheleri 37,9 millionnan asa kibershabýyldy jáne eldiń mańyzdy infraqurylym nysandaryna baǵyttalǵan 1948 DDoS-shabýylǵa toitarys berdi.
Kezdesý qorytyndysy boiynsha Prezident Ulttyq qaýipsizdik organdary qyzmetiniń baǵyttary boiynsha birqatar naqty tapsyrma berdi.
