Qazaqstan Prezidenti Qasym-Jomart Toqaev Ulttyq investorlar keńesiniń otyrysyn ótkizdi, "Ult aqparat" Aqordaǵa silteme jasap.
Jiynǵa Ulttyq investorlar keńesiniń músheleri, Prezident Ákimshiligi men memlekettik organdardyń basshylyǵy, «Atameken» Ulttyq kásipkerler palatasy prezidiýmynyń músheleri, ulttyq kompaniialar men elimizdiń biznes ókilderi qatysty.
Memleket basshysy jeke bastama men erkin kásipkerlik - ekonomikany damytýdyń jáne elimizdiń ál-aýqatyn arttyrýdyń negizgi faktorlary ekenin atap ótti. Bul faktorlar búgingi otyrys taqyrybynyń «Kásipkerlikti damytý – el ekonomikasyn jańǵyrtýdyń negizi» dep atalýyna túrtki bolǵanyn aitty.
– Byltyrǵy jyl bizdiń biznes úshin tabysty boldy. Naqty jumys isteitin shaǵyn jáne orta biznes sýbektileriniń sany 11 paiyzǵa kóbeiip, 1,3 millionǵa jetti. Shaǵyn jáne orta biznes óndiretin ónim kólemi 14 paiyzǵa artyp, 26,5 trillion teńgeni qurady. Ekonomikadaǵy bul salanyń úlesi ótken jylǵy kórsetkish boiynsha 25,6 paiyzdan 28,3 paiyzǵa deiin ósti. Bul jaman kórsetkish emes. Qazaqstanda buryn óndirilmegen 500-den astam ónim túrleri shyǵaryla bastady. Eksporttyń taralym aýmaǵy keńeiýde, otandyq ónimder álemniń 120 eliniń naryǵyna jetkizilýde. Biraq, jetistiktermen birge, birqatar sheshimin kútken másele de bar. Bul – iskerlik ahýal, taýarlardy ótkizý naryǵy, qarjylandyrýdyń qol jetimdiligi siiaqty máseleler, – dedi Qasym-Jomart Toqaev.
Qazaqstan Prezidenti qolaily iskerlik ortany, bizneske tiimdi qoldaý kórsetýdi jáne básekelestikti qorǵaýdy qamtamasyz etý jóninde birqatar mindetti belgilep berdi. Baiandamada Qazaqstan kompaniialarynyń qarjylyq turaqtylyǵyn arttyrý jáne otandyq kásipkerlerdiń biznes-daǵdysy men quzyretin jetildirý máselelerine erekshe nazar aýdaryldy.
Sońynda Qasym-Jomart Toqaev elimizdiń joǵary basshylyǵy otandyq biznespen júieli dialog júrgizý úshin Ulttyq investorlar keńesi turaqty jumys isteitin alań bolýy tiis ekenin aityp, Úkimetke Keńes jumysynyń jańa formatyn bekitý jóninde jarlyq jobasyn ázirleýdi tapsyrdy.
Otyrysta «Atameken» Ulttyq kásipkerler palatasynyń basqarma tóraǵasy Abylai Myrzahmetov, «Alageum Electric» aktsionerlik qoǵamy direktorlar keńesiniń tóraǵasy Erkebulan Iliiasov, «Textiline» jaýapkershiligi shekteýli seriktestiginiń atqarýshy direktory Inna Apenko, «Gormolzavod» jaýapkershiligi shekteýli seriktestiginiń direktory Asen Jaqsylyqov, «Method» jaýapkershiligi shekteýli seriktestiginiń direktory Dagar Davletovter baiandama jasady.
