Prezident Qasym-Jomart Toqaev Qaraǵandy oblysyndaǵy «Abai» shahtasynda metan gazynyń jarylýy saldarynan qaza tapqan shahterlerdiń jaqyndary men týystaryna kóńil aitty. Sondai-aq zardap shekken azamattardyń tezirek saýyǵyp ketýine tilektestik bildirdi, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy Úkimetke shahterlerdiń otbasylaryna kómek kórsetý jóninde tapsyrma berdi. Bolǵan oqiǵanyń anyq-qanyǵyn anyqtaý maqsatynda úkimettik komissiia quryldy.
Ministr Iýrii Ilin bastaǵan Tótenshe jaǵdailar ministrliginiń bólimsheleri apat bolǵan jerde tiisti jumystardy júrgizýge kiristi.
Eske salaiyq, 7 qarasha kúni saǵat 08:37-de «ArselorMittal Temirtaý» AQ Kómir departamentiniń «Abai» shahtasynda tótenshe jaǵdai oryn aldy. Apat kezinde shahtada barlyǵy 64 adam bolǵan. 56 adam ózderi jer betine shyqqan. Metan gazy taraǵan 3-K10 kenjarynda segiz adam qalǵan. Altaýy qaza taýyp, ekeýi zardap shekti, olardyń jaǵdaiy aýyr.
Qaraǵandy oblysynyń ákimi Jeńis Qasymbek «Abai» shahtasynda keńes ótkizdi. Jaǵdai týraly «ArselorMittal Temirtaý» AQ Kómir departamentiniń direktory Andrei Chernomaz jáne basqa da jaýapty tulǵalar baiandady.
Jedel shtab quryldy, oǵan kompaniia men memlekettik organdardyń ókilderi kirdi. Oblys jáne kompaniia basshylyǵy qaza tapqan kenshilerdiń otbasylaryna barady.
