Memleket basshysy Premer-Ministr men ákimderdiń esebin tyńdady, dep habarlaidy Aqorda.
Prezident Qasym-Jomart Toqaev Premer-Ministr Asqar Maminniń, sondai-aq, Nur-Sultan, Almaty qalalary men Aqmola, Aqtóbe, Jambyl, Qaraǵandy, Qyzylorda, Pavlodar oblystary ákimderiniń koronavirýstyń taralýyna qatysty qalyptasqan ahýal, óńirlerdiń áleýmettik-ekonomikalyq damý barysy jaiyndaǵy esepterin tyńdady.
Memleket basshysy Úkimetke jáne oblys basshylaryna pandemiianyń taralýyn tez arada shekteýge qatysty shuǵyl ári tiimdi sharalar qabyldaýǵa, koronavirýsqa shaldyqqan adamdarǵa naqty kómek kórsetýge, azamattardan test synamasyn alýdyń aýqymyn keńeitýge, dárigerlerdi arnaiy qorǵanys quraldarymen, dári-dármektermen, ókpege jasandy jolmen dem beretin apparattarmen jáne ózge de qajetti qural-jabdyqtarmen qamtasyz etýdi tapsyrdy.
Prezidenttiń pikirinshe, azamattardyń densaýlyǵyn qorǵaý isinde alǵy shepte júrgen meditsina qyzmetkerlerine materialdyq jáne moraldik turǵydan qoldaý kórsetýdiń máni zor. Úkimet pen ákimder halyq arasynda karantin rejimin saqtaýdyń asa mańyzdy ekenin túsindirip, bul baǵyttaǵy jumystardy belsendi júrgizýge tiis.
Sonymen qatar, Qasym-Jomart Toqaev ortalyq jáne jergilikti atqarýshy bilik organdaryna ekonomikanyń quldyraýyna jol bermeý, ónerkásiptik jáne aýyl sharýashylyǵy óndirisin arttyrý, azamattardyń áleýmettik qajettilikterin tolyq qamtamasyz etý boiynsha naqty sharalar qabyldaýdy tapsyrdy.
