Koronavirýs indetine qarsy is-qimyl jónindegi jiyn barysynda QR Prezidenti Qasym-Jomart Toqaev Densaýlyq saqtaý ministri Aleksei Tsoidyń jumysyna kóńili tolmaityndyǵyn ashyq aitty, dep habarlaidy "Ult aqparat".
«Eńbek ujymdarynda, jekelegen jumys maidandarynda koronavirýstyń birneshe márte órshigenin eskere otyryp, kásiporyndardyń, ásirese júieli ári qala quraýshy kásiporyndardyń jumysshylaryn belsendi immýndaý qajet. Vaktsinatsiianyń uzaqqa sozylýy – bul absraktili emes problema. Sóz eldiń ulttyq qaýipsizdigi jaiynda bolyp otyr. Bul - qosymsha naýqastar jáne azamattarymyzdyń ólim-jitimi. Bul - biznestiń tabystan aiyrylýy, biýdjetke salyqtyń tolyq túspeýi, ulttyq bailyqtyń jalpy tómendeýi», - dedi Memleket basshysy.
Osy rette QR Prezidenti elimizdiń Densaýlyq saqtaý ministri Aleksei Tsoidyń jumysyna kóńili tolmaityndyǵyn ashyq aitty.
«Aleksei Vladimiruly, buǵan deiin sizge dál qazirgi kezeńde Densaýlyq saqtaý ministrligi Úkimettegi basty figýra ekendigin aitqan edim. Sizdiń erekshe ókiletińiz bar. Siz jumysty jaqsy bastadyńyz. Degenmen odan keiin qarqyndy aitarlyqtai tómendetip jiberdińiz. Sáýir aiy ishinde jaǵdaidy túzetýińiz kerek. Olai bolmaǵan jaǵdaida sizdiń kóńilińizdi qatty qaldyratyn kadrlyq sheshim qabyldanady. Bul tek Densaýlyq saqtaý ministrine ǵana emes, sonymen birge búkil Úkimetke qatysty», - dedi Qasym-Jomart Toqaev.
Prezident Qazaqstan halyqty vaktsinalaý qarqyny jaǵynan kóshbasshy memleketterden ájeptáýir artta qalǵanyn atap ótti. Aitýynsha, búgingi tańda immýnizatsiia kýrsyn 47 myńǵa jýyq adam aiaqtaǵan (birinshi komponent 137 346 adamǵa egildi). Mundai jaǵdaiǵa vaktsina tapshylyǵy sebep bolyp otyr.
"Úkimet "Spýtnik V" boiynsha ýaǵdalastyq pen otandyq vaktsina óndirisi eldiń vaktsinalaý qajettiligin tolyǵymen óteitinine sendirdi. Osy aqparattyń negizinde men 1 aqpannan jappai vaktsinalaý bastalatynyn jariialadym. Alaida eki ai ishinde ekpe alǵandardyń sany 0,1%-ke de jetpeidi! Endi maǵan basqa memleket basshylarymen qosymsha vaktsina jetkizý týraly ýaǵdalasýǵa týra keledi... Biz jetkizýdi jedeldetý úshin ózimizge tiimsiz kommertsiialyq jáne qarjylyq sharttarǵa kelisýge májbúrmiz", - dedi Prezident.
