Foto: Akorda.kz
Prezident TMD-ǵa múshe memleketter basshylarynyń beiresmi kezdesýine qatysty, dep habarlaidy "Ult aqparat" Aqordanyń baspasóz qyzmetine silteme jasap.
Dostastyq uiymyna múshe memleketter basshylarynyń beiresmi kezdesýine Qazaqstan Prezidenti Qasym-Jomart Toqaevpen qatar Ázerbaijan Prezidenti Ilham Áliev, Armeniia Premer-ministri Nikol Pashinian, Belarýs Prezidenti Aleksandr Lýkashenko, Qyrǵyzstan Prezidenti Sadyr Japarov, Resei Prezidenti Vladimir Pýtin, Tájikstan Prezidenti Emomali Rahmon, Túrikmenstan Prezidenti Serdar Berdimuhamedov, Ózbekstan Prezidenti Shavkat Mirziioev qatysty.
Memleket basshysy Sankt-Peterbýrgte ótetin memleketter basshylarynyń kezdesýi TMD aiasyndaǵy yntymaqtastyqtyń ózekti máseleleri jóninde pikir almasýǵa jáne keleshekte atqarylatyn mindetterdi aiqyndaýǵa jaqsy múmkindik beretinin jetkizdi.
Qasym-Jomart Toqaev Qazaqstan TMD-ǵa tóraǵalyǵy aiasynda Dostastyqtyń áleýetin kúsheitý úshin birqatar naqty shara qabyldaǵanyn atap ótti.
– Jyl boiy 80-nen astam iri shara ótkizildi. Ekonomikalyq yntymaqtastyqty keńeitýge, tyǵyz gýmanitarlyq bailanystardy saqtaýǵa jáne Uiymnyń bedelin arttyrýǵa baǵyttalǵan kóptegen bastama júzege asyryldy. Bizdiń birlesken kúsh-jigerimiz qazan aiyndaǵy Astana sammitiniń qorytyndysy boiynsha qabyldanǵan qujattarda aiqyn kórindi. Jyl boiy, eń aldymen, TMD-nyń 2030 jylǵa deiingi ekonomikalyq damý strategiiasynyń mindetterin iske asyrýǵa erekshe nazar aýdaryldy. Bul baǵyttaǵy jumystar tabysty boldy. Qazaqstannyń TMD-ǵa múshe memlekettermen aradaǵy taýar ainalymy qańtar-qazan ailarynda 11 paiyzǵa artyp, shamamen 30 milliard dollarǵa jetti. Byltyr osy kezeńde 26,5 milliard dollar boldy. Ósim shamamen 5 milliard dollardy qurady. Bul – jaqsy úrdis, – dedi Memleket basshysy.
Prezident ishki óńirlik saýda-sattyqtyń qarqynyn saqtap, ekonomikalyq saiasatty qazirgi jaǵdailarǵa beiimdeý mańyzdy ekenin aitty. Sondai-aq TMD-ǵa múshe memleketter basshylarynyń nazaryn mynadai ózekti mindetterdi sheshýge aýdardy.
– Saýda-sattyqqa qolaily jaǵdai jasaýǵa basa mán berý kerek. Ol úshin tariftik jáne tariftik emes kedergilerdi joiý, protektsionizmge jol bermeý jumystaryn jan-jaqty júrgizgen jón dep esepteimiz. Azyq-túlik qaýipsizdigi máselelerine qatysty is-áreketterdi jolǵa qoiý qajet. Kelesi jyly Astanada ótetin TMD-ǵa múshe memleketter ministrleriniń konferentsiiasy osy salada ortaq tásilder qarastyrýǵa arnalady. Osy saladaǵy ministrler belsendi qatysady dep senemiz. TMD keńistiginde kólik-logistikalyq jobalardyń tiimdiligin arttyrý úshin yntymaqtastyqtyń jańa mehanizmderi men formaty kerek. Osy tusta «Soltústik – Ońtústik» halyqaralyq dáliziniń mańyzy artyp otyr, sondai-aq «Qazaqstan – Túrikmenstan – Iran» temir joly mańyzdy kólik baǵyty retinde zor ról atqarady, – dedi Prezident.
Memleket basshysy qaýipsizdik salasyndaǵy is-áreketterdi kelesi mańyzdy baǵyt retinde atap ótti. Qazaqstan tóraǵalyǵy aiasynda qabyldanǵan 2023-2025 jyldarǵa arnalǵan terrorizm men ekstremizmge qarsy kúrestegi yntymaqtastyq baǵdarlamasy bul mindetterdi atqarýǵa tolyq sai keledi.
– Uiymdy qazirgi jahandyq jaǵdailarǵa beiimdeý úshin onyń áleýetin únemi jetildirip, Dostastyqtyń halyqaralyq arenadaǵy bedelin kúsheitýge týra keledi. Jaqyn arada TMD janyndaǵy Baqylaýshy jáne Dostastyqtyń seriktesi institýttaryn qurýǵa qatysty qujattardy ázirleý jumystary bastalady. TMD keńistiginde ortaq mádeni-gýmanitarlyq yntymaqtastyq jáne tilderdiń qoldanys aiasyn keńeitý isiniń máni zor. Sankt-Peterbýrgke Dostastyqtyń 2023 jylǵy Mádeni astanasy resmi mártebesin berý TMD-ǵa múshe memleketter arasyndaǵy mádeni bailanystardy nyǵaitýǵa yqpal etedi, – dedi Qasym-Jomart Toqaev.
Memleket basshysy Qasym-Jomart Toqaev jiynǵa shaqyrǵany jáne qonaqjailyq kórsetkeni úshin Vladimir Pýtinge rizashylyǵyn bildirdi. Sondai-aq Sadyr Japarovqa Qyrǵyz Respýblikasynyń TMD-ǵa aldaǵy tóraǵalyǵyna tabys tiledi.
