Foto: Akorda.kz
Qasym-Jomart Toqaev elimizge memlekettik saparmen kelgen Tájikstan Prezidenti Emomali Rahmonǵa Qazaqstan Respýblikasynyń joǵary memlekettik nagradasy – «Altyn Qyran» ordenin tabys etti, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy orden tabystaý rásiminde tájik halqynyń jalpyulttyq kóshbasshysynyń airyqsha eńbegine toqtaldy jáne onyń kóregen saiasaty Tájikstandy qarqyndy damýyna yqpal etip, otandastarynyń igiligin qamtamasyz etkenin aitty.
Sonymen qatar Qasym-Jomart Toqaev Qazaqstan men Tájikstannyń baýyrlas halyqtary arasyndaǵy dostyqty, ózara túsinistik pen yntymaqtastyqty nyǵaitýǵa Emomali Rahmonnyń qosqan úlesin atap ótti.
– Biz árdaiym barlyq deńgeidegi tyǵyz jáne senimdi saiasi dialogty qoldaimyz. Elderimiz arasynda berik sharttyq-quqyqtyq baza qalyptasty. Saýda-ekonomikalyq yntymaqtastyq qarqyndy damyp, mádeni-gýmanitarlyq bailanystardyń aiasy udaiy keńeiip keledi. Biz Ortalyq Aziiadaǵy jan-jaqty yntymaqtastyqty nyǵaitýǵa úles qosa otyryp, asa mańyzdy halyqaralyq qurylymdar aiasynda ózara tabysty áreket etip kelemiz. Búginde memleketaralyq bailanystarymyzdyń odaqtastyq qatynas deńgeiine kóterilgeni qýantady. Bul Sizdiń eki el arasynda úlgili qarym-qatynas qalyptastyrýǵa erekshe atsalysqanyńyzdyń nátijesinde múmkin boldy, – dedi Memleket basshysy.
Emomali Rahmon «Altyn Qyran» ordenimen marapattaý jóninde sheshim qabyldaǵany úshin Qasym-Jomart Toqaevqa rizashylyǵyn bildirdi.
– Bul nagrada, eń aldymen, búkil Tájikstan halqynyń tájik-qazaq qatynastaryn, dostyǵy men yntymaqtastyǵyn damytýǵa jáne nyǵaitýǵa qosqan úlesi úshin berilgen joǵary baǵa dep bilemin. Baýyrlas halyqtarymyzdyń igiligi úshin Tájikstan men Qazaqstan arasyndaǵy strategiialyq seriktestikti jan-jaqty nyǵaitýǵa jáne keńeitýge aldaǵy ýaqytta da bar kúsh-jigerimizdi salatynymyzǵa senimdimin, – dedi Tájikstan Prezidenti.
