Memleket basshysy Qasym-Jomart Toqaev Tájikstan prezidenti Emomali Rahmonǵa kóńil aitý jedelhatyn joldady, - dep habarlaidy "Ult aqparat" Aqorda saityna silteme jasap.
Qasym-Jomart Toqaev Emomali Rahmonǵa jáne tájik halqyna barsha qazaqstandyqtardyń jáne jeke óziniń atynan tájik-qyrǵyz shekarasynda bolǵan qaiǵyly oqiǵa saldarynan kóptegen jaýynger men beibit turǵyndardyń qaza tabýyna bailanysty kóńil aitty.
"Biz baýyrlas jáne dostas memleketterdegi bul qaiǵyly oqiǵa bizdi qatty alańdatady. Qazaqstan aimaqtaǵy kez kelgen daýly máseleni tek beibit jolmen jáne saiasi diplomatiialyq ádistermen sheshýdi jaqtaidy", – delingen jedelhatta.
Qazaqstan Prezidenti qaza tapqandardyń týystary men jaqyndaryna kóńil aityp, zardap shekkenderdiń tezirek saýyǵyp ketýine tilektestik bildirdi.
