Memleket basshysy Qasym-Jomart Toqaev Saýda jáne integratsiia ministri Baqyt Sultanovty qabyldady, dep habarlaidy Aqorda.
Qasym-Jomart Toqaevqa ótken jylǵy saýda júiesiniń damý qorytyndylary, onyń ishinde, syrtqy jáne ishki saýdany keńeitý jóninde qabyldanǵan sharalar jaily baiandaldy.
Kezdesý barysynda jaǵymsyz ózgeristerge qaramastan, Qazaqstannyń shikizattyq emes eksportynyń oń dinamikasyn saqtap qalǵany aityldy. Prezident qazaqstandyq ónimniń eksportqa shyǵarý naryǵyn keńeitýdiń jáne onyń básekege qabilettiligin arttyrýdyń mańyzdylyǵyn atap ótti.
Biyl Qazaqstan Eýraziialyq ekonomikalyq odaqqa tóraǵalyq etedi. Osy rette bizdiń elimiz eýraziialyq integratsiiany damytýǵa, saýda kedergilerin joiýǵa jáne taýarlar men qyzmetterdiń erkin ainalymyn qamtamasyz etýge basa mán berip otyr.
Ishki saýda salasyna qatysty Qasym-Jomart Toqaev Baqyt Sultanovqa ulttyq taýar ótkizý júiesin qurý, naryqty otandyq ónimmen tolyqtyrý úshin jaǵdai jasaý jáne atalǵan sektordyń ornyqty damýyn qamtamasyz etý jónindegi jumystardy sapaly ári jedel atqarýdy mindettedi. Júie Ózbekstan, Qyrǵyzstan, Tájikstan jáne Reseidegi kóterme-taratý ortalyqtary jelisinen turatyn eýraziialyq taýar ótkizý jelisiniń negizi bolýǵa tiis.
Memleket basshysy Saýda jáne integratsiia ministrine otandyq ónimdi shyǵaratyn naryqtardy keńeitý maqsatynda Eýraziialyq ekonomikalyq odaq sheńberinde jáne úshinshi eldermen kooperatsiialyq jobalarǵa qatysý úshin Qazaqstannyń saýda-logistikalyq áleýetin nyǵaitý jóninde sharalar qabyldaýdy tapsyrdy.
