Foto: Aqorda
Prezident Qasym-Jomart Toqaev elimizde sot otyrystaryn onlain ótkizýge qatysty oiyn aitty. Bul týraly Memleket basshysy Qazaqstan Respýblikasy Sýdialarynyń IH sezinde aitty, dep habarlaidy Ult.kz.
Ol sot isin qashyqtan júrgizý azamattyq ister boiynsha aýmaqaralyq sottylyq júiesin engizýge múmkindik bergenin aitty.
Sondai-aq osy tájiribeni ákimshilik isterde qoldanýdy kózdeitin zań jobasy depýtattardyń qaraýynda jatyr.
"Biyl sot otyrystary alǵash ret onlain kórsetile bastady. Osyndai tásilmen eki sot protsesi ótti. Sot isteri milliondaǵan adamnyń kóz aldynda meilinshe ashyq júrgizildi. Mundai qadam jurttyń sot júiesine senimin nyǵaita tústi deýge bolady. Bul – árine, buryn-sońdy bolmaǵan jańashyldyq", - dedi ol.
Sondyqtan, prezidenttiń sózinshe, sýdialar men aiyptaýshylarǵa qoiylatyn talap kúsheidi. Sotqa qatysýshy taraptar ashyq sot alańynda óz oilaryn erkin jetkize alady.
"Barlyq sot otyrysynda osyndai joǵary standart bolýy kerek. Sotty onlain ótkizýdiń taǵy bir utymdy tusy bar. Azamattardyń quqyqtyq sana-sezimi ózgerip keledi. Zańger mamandyǵyna degen qyzyǵýshylyq artty. Jastar zań salasyndaǵy mamandardy úlgi tuta bastady. Munyń bári qoǵamda kásibi maman bolý qundylyǵyn dáripteýge múmkindik beredi. Jalpy, sotty onlain ótkizý jurttyń quqyqtyq mádenietin kóterýge oń áser etýde. Bul – elimizde Zań men Tártip qaǵidatyn ornyqtyratyn tiimdi tásil", - dedi memleket basshysy.
Aita keteiik, elimizde biyl eks-ministr Qýandyq Bishimbaevqa qatysty atyshýly qylmystyq is ashyq ótkizilgen edi. Joǵarǵy sottyń efirin júzdegen myń qazaqstandyq qaraǵan.
