Foto: Akorda.kz
Prezident Almaty qalasyn damytý máseleleri jóninde keńes ótkizdi, dep habarlaidy "Ult aqparat" Aqordanyń baspasóz qyzmetine silteme jasap.
Jiyndy ashqan Memleket basshysy byltyr kúzde Almaty jurtshylyǵymen kezdesý barysynda qalany damytýdyń basty baǵyttary aiqyndalǵanyn atap ótip, nátijesinde Almatyny damytýdyń 2030 jylǵa deiingi baǵdarlamasy qabyldanyp, shahardyń 2040 jylǵa deiingi Bas jospary bekitilgenin aitty.
"Aldaǵy 20 jylda Almaty halqynyń sany 3 millionǵa jýyqtaidy degen boljam bar. Bolashaqta qala ishindegi bes aýmaq ortalyq retinde damidy. Sonda ortalyqtaǵy qazirgi ahýal birshama jeńildep, barlyq aýdanǵa birdei salmaq túsedi. Sońǵy 10 jylda qala óte jyldam ári retsiz ósti. Almatynyń aýmaǵy eki eseden astam keńeidi. Biraq infraqurylymnyń damýy ár jerde ártúrli bolyp otyr. Qalada turǵyndar sany ortasha alǵanda jyl saiyn 70 myń adamǵa kóbeiip keledi. Jumysqa, sabaqqa barý úshin irgeles eldi mekenderden kún saiyn 500 myń adam Almatyǵa kelip ketedi. Mundai túitkilderdi ýaqtyly anyqtap, der kezinde sheship otyrý qajet", – dedi Memleket basshysy.
Keńes barysynda qalanyń kommýnaldyq, jol jáne áleýmettik infraqurylymyn damytý, sondai-aq bilim, ekologiia jáne meditsina salalarynda qordalanyp qalǵan problemalardy sheshý joldary talqylandy.
Prezident Almaty qalasyn damytýǵa qatysty negizgi problemalardy sheshý úshin júieli sharalar qabyldaý qajet ekenin aitty.
Memleket basshysy taiaýda «Aqkent» yqsham aýdanyndaǵy kópqabatty turǵyn úide bolǵan órtti mysalǵa keltirip, órt qaýipsizdigi salasyndaǵy ahýaldy synǵa aldy. Prezident Tótenshe jaǵdailar ministrligine órt kezinde saqtalýǵa tiis qaýipsizdik sharalary jóninde halyqtyń saýatyn arttyrý úshin jappai oqý-jattyǵý sharalaryn uiymdastyrýdy tapsyrdy. Al qala ákimdigine órtke qarsy kúres qyzmetiniń materialdyq-tehnikalyq bazasyn kúsheitý úshin pármendi sharalar qabyldaý mindeti júkteldi.
Prezident Almatynyń ekologiialyq ahýalyn jaqsartý úshin qaladaǵy kólik qozǵalysyn rettep, elektromobilderge arnalǵan infraqurylymdy damytý qajet dep sanaidy.
Qala ákimi Erbolat Dosaev 2025 jyldyń sońyna deiin qaladaǵy qoǵamdyq kólik salasy tolyqtai ekologiialyq standartqa kóshiriletinin baiandady. Budan bólek, qajetti infraqurylymdy damytý arqyly halyqtyń elektromobilge degen suranysyn arttyrý múmkindikteri qarastyrylyp jatyr.
Almaty qalasyndaǵy injenerlik infraqurylymnyń jai-kúii de Prezident nazarynan tys qalmady. Memleket basshysynyń aitýynsha, elimizdegi eń basty syn-qaterdiń biri – sapaly aýyzsýmen qamtamasyz etý. Tájiribe kórsetkendei, Almatyda da bul turǵyda jaǵdai máz emes.
Onyń sózinshe, shaharda sýdyń úzdiksiz berilýine kedergi keltiretin apatty jaǵdailar tym jiilep ketýi sýmen qamtamasyz etý salasyndaǵy problemalardy kezek kúttirmei sheshý qajet ekenin kórsetedi.
Qasym-Jomart Toqaev sońǵy kezde sel júrip, ózen sýlarynyń lailanýy jiilep ketkeni alańdaýshylyq týǵyzatynyn aitty. Sonyń saldarynan shilde aiynyń sońynda kommýnaldyq qyzmetter qalanyń joǵarǵy bóligindegi aýdan turǵyndaryna sý berýdi shekteýge májbúr boldy. Medeý aýdanyndaǵy 50 kóppáterli úi men 4 myńnan astam jeke turǵyn úi sýsyz qaldy. Bul turǵyndardyń oryndy narazylyǵyn týǵyzdy.
Prezident elimizdiń eń úlken shaharyndaǵy sý sharýashylyǵyn retke keltirý úshin atqarylýǵa tiis negizgi mindetterdi aiqyndap berdi. Atap aitqanda, Úkimet pen qala ákimdigine merdigerlerdiń kinásinen keshiktirilgen Qarǵaly sý jinaqtaý nysanyn biyl qazan aiynyń sońyna deiin paidalanýǵa berý, qalanyń sý sharýashylyǵyna tolyq tekseris jasaý jáne Almatynyń joǵarǵy bóligin sýmen tolyq qamtý úshin jerasty sý kózderine gidrogeologiialyq barlaý jumystaryn júrgizý, sondai-aq «Balqash» stantsiiasyndaǵy rezervýar men tórt skvajinanyń qurylysyn aiaqtaý mindetteri júkteldi.
Sonymen qatar Prezident turǵyndardyń áleýmettik jaǵdaiyn jaqsartýǵa qatysty birqatar problemaǵa toqtaldy. Memleket basshysynyń pikirinshe, eń aldymen, NEET sanatyna jatatyn jastardyń arasyndaǵy jumyssyzdyq máselesine airyqsha nazar aýdarý qajet. Úkimetke jáne ákimdikke jastardy jumyspen qamtý úshin arnaiy baǵdarlama ázirleý jóninde tapsyrma berildi.
Prezident kótergen taǵy bir mańyzdy másele – Almatynyń densaýlyq saqtaý salasyndaǵy ahýal. Memleket basshysynyń aitýynsha, qazir qaladaǵy densaýlyq saqtaý uiymdary shamadan tys júktememen jumys istep jatyr. Ábden tozyǵy jetken infraqurylymdy Áleýmettik meditsinalyq saqtandyrý qorynyń qarjysy esebinen jáne memlekettik-jekeshelik áriptestik negizindegi jobalardy júzege asyrý arqyly keshendi túrde jańǵyrtý qajet. Prezident Densaýlyq saqtaý ministrligine meditsina mekemelerindegi qarjy tapshylyǵyn joiý úshin keshendi sharalar qabyldaýdy tapsyrdy.
Budan bólek, keńes barysynda Almaty ekonomikasyn ártaraptandyrý máseleleri talqylandy. Qasym-Jomart Toqaev shaǵyn jáne orta kásipkerliktiń damý áleýetine oń baǵa berdi. Keltirilgen málimetterge sáikes 2022 jyldyń ózinde Almaty memlekettik biýdjetke tórt trillion teńgeden astam qarjy quidy. Qaladaǵy salyq túsimderiniń basym bóligi shaǵyn jáne orta biznestiń tólemderine tiesili.
Prezident megapolistegi biznes-ahýaldy jaqsartý úshin júieli sharalar qabyldaý jóninde mindet júktedi. Qasym-Jomart Toqaevtyń pikirinshe, jeke kapitaldy tartý, kásipkerlikti damytý baǵdarlamasyn kúsheitý, jańa kólik-logistikalyq ortalyqtaryna qoldaý kórsetýdiń tyń sharalaryn qarastyrý, kreativti indýstriia, týrizm salalaryn damytý Almaty ekonomikasyna tyń serpin berýge tiis.
Sonymen qatar jiyn barysynda Almaty qalasynyń ákimi Erbolat Dosaev, Premer-Ministrdiń birinshi orynbasary Roman Skliar, Premer-Ministrdiń orynbasary – Eńbek jáne halyqty áleýmettik qorǵaý ministri Tamara Dúisenova sóz sóiledi.
