Memleket basshysy Singapýrdyń aǵa ministri – ulttyq qaýipsizdik máseleleri jónindegi úilestirýshi ministr Teo Chi Hindi qabyldady, dep habarlady Aqordanyń baspasóz qyzmeti.
Kezdesý barysynda taraptar Qazaqstan men Singapýr arasyndaǵy qazirgi jaǵdaidy jáne saiasi, saýda-ekonomikalyq salalar boiynsha perspektivalyq jobalardy, sonymen qatar, tsifrlandyrýǵa qatysty birlesken is-qimyl máselelerin talqylady.
Eki el arasynda dostyq qarym-qatynas ornaǵanyn aitqan Qasym-Jomart Toqaev qazan aiynda Erevanda ótken JEEO sammitinde Singapýr Premer-ministri Li Sian Lýnmen keleli kelissóz jasaǵanyn jetkizdi. Sondai-aq Memleket basshysy Singapýr Prezidenti Halima Iakobke óziniń sálemin jetkizýdi ótindi.
– Men Singapýr Prezidentin burynnan tanimyn. Ekeýmiz de óz elderimizdiń Parlamentterinde spiker qyzmetin atqardyq. Men onyń Memleket basshysy bolǵanyna óte qýanyshtymyn,– dedi Qasym-Jomart Toqaev.
Óz kezeginde Teo Chi Hin Qasym-Jomart Toqaevqa Singapýr Prezidenti men Premer-ministriniń aqjarma tilegin jetkizdi. Sonymen qatar eki el arasyndaǵy bailanystardy odan ári nyǵaita berýge nietti ekenin atap aitty.
