Prezident Qasym-Jomart Toqaev QHR tóraǵasy Si Tszinpindi "Altyn Qyran" ordenimen nagradtady, - dep habarlaidy "Ult aqparat" Aqordaǵa silteme jasap.
"Memleket basshysy Qazaqstan Respýblikasy men Qytai Halyq Respýblikasy arasyndaǵy ekijaqty saiasi, ekonomikalyq jáne mádeni qatynastardy nyǵaitýǵa jáne damytýǵa qosqan airyqsha úlesi úshin QHR Tóraǵasy Si Tszinpindi "Altyn Qyran" ordenimen nagradtady", - delingen habarlamada.
Sondai-aq, Aqordanyń baspasóz qyzmeti eki el basshysynyń marapattaý rásiminde sóilegen sózin jariialady.
Qazaqstan Prezidenti Qasym-Jomart Toqaevtyń sóilegen sózi:
Qurmetti Si Tszinpin myrza! Qymbatty dosym! Hanymdar men myrzalar!
Búgin uly Qytai eliniń basshysy Si Tszinpin myrza Qazaqstanǵa memlekettik saparmen kelip otyr. Bul – biz úshin zor mártebe. Siz – halqyńyzdyń jappai qoldaýyna ie bolǵan naǵyz kóshbasshysyz. Búkil Qytaiǵa jańashyldyq, rýh berip, dana saiasatyńyzben memleketti alǵa bastap kelesiz. El basqarý isinde mol tájiribeńiz jáne erekshe tulǵalyq qasietterińiz bar. Osynyń bári ózińizdi jurtyńyzdyń yqylasyna bóledi. Sizdiń basshylyǵyńyzben halqyńyz jańa dáýirge qadam basty. Qytai ultynyń uly jańǵyrý kezeńi bastaldy. Byltyr Qytai eli birinshi júzjyldyq mereitoiynyń maqsatyn oryndady. Oǵan barsha álem jurtshylyǵy kýá boldy. Sizder kedeilikti birjolata joiyp, ortasha turmysy bar qoǵam qurdyńyzdar. Tutas dáýirdi ózgertken osy jeńis ekinshi júzjyldyq mereitoidyń basty mindetterin tabysty oryndaýǵa jol ashary anyq. Qytai Halyq Respýblikasy ǵasyrlyq belesine deiin damyǵan, aldyńǵy qatarly memleketke ainalady dep senemin. Sizdiń taǵdyry ortaq adamzat qoǵamdastyǵyn qurý týraly ozyq ideiańyz jáne «Bir beldeý - bir jol» atty tarihi bastamańyz jer júziniń nazaryn aýdardy. Osy tujyrym jańa úlgidegi halyqaralyq qatynastar júiesin qurýǵa negiz boldy. Bul úlgi ózara tiimdi yntymaqtastyq ornatýdy kózdeidi. Sizdiń jahandyq qaýipsizdik pen damýdy qamtamasyz etý jónindegi strategiialyq bastamalaryńyzdyń mańyzy óte zor. Qazir barsha adamzattyń aldynda kúrdeli syn-qaterler tur. Sizdiń oilaryńyz osyǵan batyl toitarys retinde baǵalanyp, álemde keńinen talqylanýda.
Sizdiń qazaq-qytai qarym-qatynasyn turaqty damytýǵa qosqan úlesińiz ushan-teńiz. Biz 2019 jyly ózińizben birge eki eldiń yntymaqtastyǵyn jańa deńgeige kóterýge kiristik. Máńgilik ári jan-jaqty strategiialyq seriktestik ornatýǵa ýaǵdalastyq. Qazaqstan Qytai elimen túrli saladaǵy yntymaqtastyqty nyǵaitýǵa múddeli. Biz bolashaqqa birge qadam basamyz. Osy jolda myzǵymas dostyqtan ainymaimyz.
Siz Qazaqstan men Qytai halyqtary arasyndaǵy dostyq pen yntymaqtastyqty nyǵaitýǵa orasan zor eńbek sińirdińiz. Biz muny joǵary baǵalaimyz. Men osy saladaǵy airyqsha tarihi rólińizdi eskere otyryp, Sizdi «Altyn Qyran» ordenimen marapattaý týraly sheshim qabyldadym. Bul marapat – Qazaqstan Respýblikasynyń eń joǵary nagradasy. Bul sheshim ekijaqty qarym-qatynastar shejiresine altyn árippen jazylary sózsiz.
Qytai Halyq Respýblikasynyń Tóraǵasy Ci Tszinpinniń sóilegen sózi:
Qurmetti Prezident Toqaev myrza! Qurmetti dostar!
Búgin meni «Altyn Qyran» ordenimen nagradtadyńyz. Bul maǵan ǵana kórsetilgen erekshe qurmet emes, sondai-aq Sizdiń elińizdiń qazaq-qytai qatynastaryn damytýǵa zor mán beretinin jáne qazaq halqynyń qytai halqyna degen dostyq sezimin kórsetedi.
Prezident Toqaev myrza, Sizge jáne dostas qazaq halqyna shyn júrekten rizashylyǵymdy bildiremin. Eki el arasyndaǵy diplomatiialyq qatynastarǵa 30 jyl toldy. Sodan beri qazaq-qytai yntymaqtastyǵynyń joǵary damý deńgeii berik saqtalyp keledi.
Bizdiń elderimiz arasyndaǵy saiasi ózara seriktestik nyǵaiyp keledi. Ártúrli saladaǵy yntymaqtastyq qarqyndy damýda. Halyqaralyq qatynastarda tyǵyz bailanys ornady. Munyń bári elderimizdiń damýy men órkendeýine berik tirek boldy. Aimaqtaǵy beibitshilik pen turaqtylyqty qoldaýǵa tyń serpin berdi.
Osy sapar barysynda Prezident Toqaev ekeýimiz Qytai men Qazaqstan qarym-qatynasynyń mártebesin kóterýge kelistik. Bolashaqqa kóz júgirte otyryp, biz máńgilik dostyqqa, ózara tiimdilikke jáne órkendeýge baǵyttalǵan bailanystarymyzdyń jarqyn bolashaǵyna senimmen qaraimyz.
Men halyqtarymyzdyń dostyǵyn tanytatyn bul ordendi óte joǵary baǵalaimyn. Birlesken kúsh-jigerimizdiń arqasynda Qazaqstan men Qytai arasyndaǵy yntymaqtastyqtyń nyǵaiyp, elderimiz ben halyqtarymyzdyń igiligi úshin qyran qustai alysqa samǵaitynyna senimdimin!
