Biliktilik deńgeii teń sheteldik jáne jergilikti jumysshylarǵa birdei jalaqy tóleý máselesin baqylaýǵa alý kerek. Bul týraly Memleket basshysy Qasym-Jomart Toqaev Atyraý oblysy jurtshylyǵymen kezdesýinde aitty, dep habarlaidy "Ult aqparat" QR Prezidentiniń baspasóz hatshysy Berik Ýálige silteme jasap.
«Biliktilik deńgeii teń sheteldik jáne jergilikti jumysshylarǵa birdei jalaqy tóleý máselesin baqylaýǵa alý kerek. Birdei jumysqa ártúrli jalaqy tóleýge jol berýge bolmaidy.
Árine, bizdiń jumysshylarymyz bilim deńgeii jáne jumys tájiribesine qoiylatyn joǵary talaptarǵa sai kele me degen suraq - basty másele ekeni túsinikti», - dedi Memleket basshysy.
Sondai-aq, Prezident bilikti mamandardy esh alalamai, laiyqty jalaqysyn tóleý kerektigin de jetkizdi.
«Qalǵanyn oqytyp, úiretip, qajet deńgeige jetkizýimiz kerek» - dedi Memleket basshysy.
SOndai-aq, Qasym-Jomart Toqaev kezdesýde barlyq kompaniialar arasynda ádil jáne adal báseke bolýy kerektigin aitty.
«Jergilikti ónim óndirýshiler úshin teń quqyly jaǵdai jasaý kerek. Qazir salyq jáne basqa da biýdjettik tólemder boiynsha tek sheteldik jetkizýshilerge jeńildik bar.
Sonyń kesirinen, bizdiń kásipkerler baiqaýǵa qatysýǵa áreket te jasamaidy, sebebi, odan esh paida joq ekenin biledi. Import ónimi báribir arzanǵa túsedi», - dedi Prezident.
Sonymen qatar ol bul máseleni júieli sheshý qajet ekenin eskertti.
«Bul - bizdiń júieli máselemiz, ony Úkimet jedel túrde sheship, jaǵdaidy ózgertýi tiis. Barlyq kompaniialar arasynda ádil jáne adal báseke bolýyn qamtamasyz etetin naqty, aiqyn júie jasaý kerek. Bul bárine paidaly bolady», - dedi Memleket basshysy.
Eske sala ketsek, keshe Qasym-Jomart Toqaev Atyraý oblysyna jumys saparymen kelgendigi týraly habarlaǵan bolatynbyz.
