Prezident Qasym-Jomart Toqaev Almatydaǵy №199 gimnaziia muǵalimi marqum Merei Ibragimovty adam ómirin saqtap qalýǵa bailanysty qiyn-qystaý jaǵdaida kórsetken erjúrektigi men janqiiarlyǵy úshin marapattady, - dep habarlaidy "Ult aqparat" Aqordaǵa silteme jasap.
"Adam ómirin saqtap qalýǵa bailanysty qiyn-qystaý jaǵdaida kórsetken erjúrektigi men janqiiarlyǵy úshin Almaty qalasy "№ 199 mamandandyrylǵan gimnaziia" KMM muǵalimi Merei Nurǵazyuly Ibragimov "Erligi úshin" medalimen nagradtalsyn (marqum). Osy Jarlyq qol qoiylǵan kúninen bastap qoldanysqa engiziledi", - delingen qaýlyda.
Prezidenttiń baspasóz hatshysy Berik Ýáli Memleket basshysy Sharyn shatqalyndaǵy qaiǵyly oqiǵa kezinde qaza tapqan Merei Ibragimovtyń jaqyndary men týystaryna kóńil aitatynyn habarlady. Onyń sózinshe, Prezident 29 mamyr kúni Almaty oblysyndaǵy Sharyn shatqalynda bolǵan qaiǵyly oqiǵany úlken kúizelispen qabyl aldy. Qasym-Jomart Toqaev qaitys bolǵandardyń jaqyn týystaryna kóńil aityp, jaraqat alǵandardyń tezirek saýyǵyp ketýine tilektestik bildirdi.
"Shákirtterin qutqaramyn dep ózi qurban bolǵan bilikti maman Merei Nurǵazyuly ómirin ustazdyqqa arnady. Oqýshylarynyń súiikti muǵalimi boldy. Tabiǵat tosyn minez kórsetken apatty jaǵdaida jas ustaz batyldyq tanytyp, oqýshysyna jankeshtilikpen kómek kórsetýge umtyldy. 26 jasynda ómirden qyrshyn ketken Merei Nurǵazyulynyń erligi men jarqyn beinesi umytylmaidy", - delingen kóńil aitý jedelhatynda.
Esterińizge sala ketsek, 29 mamyr kúni Almaty oblysynyń Sharyn shatqalynda sel júrip, 2 adam mert bolǵany, taǵy bireýiniń iz-túzsiz joǵalǵany habarlanǵan bolatyn.
Keiin Bilim jáne ǵylym ministrligi atalǵan oqiǵa saldarynan 1 oqýshy men 1 muǵalimniń qaza tapqanyn, taǵy bir oqýshyny izdeý jumysy júrgizilip jatqanyn málim etken edi.
«Sharyn shatqaly» qyzmetkerleri Sharyn ózeniniń boiyn jaǵalai jer betinde izdeý-qutqarý jumystaryn júrgizý barysynda 30 mamyr tańǵy saǵat 09:34-te 11 jastaǵy qyz balany tapty.
Ol Sharyn ózeniniń sol jaǵalaýynda oqiǵa ornynan 3-4 shaqyrym jerden tabylǵan.
Almaty qalalyq bilim basqarmasy Sharyn shatqalyna ekskýrsiia mektep ákimshiligimen kelisilmegenin jetkizdi.
