QR Parlament Senatynyń tóraǵasy Qasym-Jomart Toqaev Asqar Myrzahmetovty aýyl sharýashylyǵyn damytý úshin belsendi sheshimder qabyldaýǵa shaqyrdy, - dep habarlaidy kaz.tengrinews.kz tilshisi.
Senattaǵy otyrys kezinde agrarlyq máseleler komitetiniń múshesi Serik Bilálov aýyl sharýashylyǵy ministrinen agrarlyq sektorǵa sýbsidiia bólýdiń qanshalyqty nátijeli ekenin surady.
"Aýyl sharýashylyǵy ministri Asqar Myrzahmetovke suraǵym bar. Jyl ótken saiyn biýdjetten aqsha kóbirek bólingenimen nege agrarlyq sektorda ońdy ózgerister kórmeimiz?", - dep surady Serik Bilálov.
Asqar Myrzahmetov buǵan jańa baǵdarlama aiasynda barlyq sýbsidiia qaita qaralǵanyn aitty.
"Sýbsidiianyń 11 túri alyp tastalady, nátijesizderi. Jylyna ortasha 25 milliard teńge únemdelip, ońdy kórsetkishteri bar baǵyttarǵa jumsalady. Nátijesinde sol biýdjet qarajatyna aýyl sharýashylǵy ónimderi 20-30 paiyzǵa artady", - dedi ministr.
Toqaev Myrzahmetovtiń jylyna 60 myń tonna et eksportqa shyǵarylatyny týraly bergen ýádesin esine saldy.
"Ár ministr kelip, jańa baǵdarlama jasaidy. Bul baǵdarlama emes, jaqsy tilekter ǵana siiaqty. 2020 jyly taǵy bir baǵdarlama ashylatyn siiaqty. Onyń jarnamasyn kúsheitedi, 60 myń tonna etti eksporttaý jospary siiaqty. Senatta onyń múmkin emes ekeni aityldy ǵoi. Bul baǵdarlamany sonsha jarnamalap, Elbasynyń aýzyna salyp qoidyńdar", - dedi Qasym-Jomart Toqaev.
"Senimdi aqtamai otyrsyz, Asqar Isabekuly (Myrzahmetov). Aýyl sharýashylǵynyń mamanysyz, sizge senim artyp, ókilet berdi - premer-ministr orynbasary. Sheshim qabyldańyz, alǵa jyljýymyz kerek. Baǵdarlamany kez kelgen adam qur jazyp qoia alady. Qiyn bolyp pa? Naqty qadamdar kerek", - dep aiaqtady ol sózin.
