Memleket basshysy Parlament Senatynyń Tóraǵasy Máýlen Áshimbaevty qabyldady, - dep habarlaidy "Ult aqparat" Aqordaǵa silteme jasap.
Qasym-Jomart Toqaevqa Parlamenttiń joǵarǵy Palatasynyń zań shyǵarýshylyq qyzmeti týraly málimet berildi.
Máýlen Áshimbaev Senattyń qaraýynda jatqan zań jobalary jóninde habarlady. Olardyń ishinde Memleket basshysynyń bastamasymen engizilgen jer qatynastaryn retteitin túzetýler erekshe oryn alady.
Spiker Májilis maquldaǵan zań jobasy osy aidyń aiaǵyna deiin Senattyń otyrysyna engiziletinin, sodan keiin qujat Prezidentke qol qoiýǵa jiberiletinin aitty.
Al sailaý zańnamasyna engiziletin ózgeristerge keler bolsaq, senatorlar atalǵan zań jobasynyń Májilis qaraýynan ótýin kútip jatyr. Máýlen Áshimbaevtyń aitýynsha, Senat bul máseleni mamyr aiynyń birinshi onkúndiginde qarap, tiisti zań jobasyn qabyldaýdy josparlap otyr.
Sonymen qatar Senat Tóraǵasy Parlamenttiń jyl basynan beri Eýraziialyq ekonomikalyq odaq aiasynda qol qoiylǵan 8 halyqaralyq shartty ratifikatsiialaǵanyn jetkizdi. Qazirgi ýaqytta Armeniia men Qyrǵyzstannyń Eýraziialyq ekonomikalyq odaqqa qatysýyna bailanysty keibir máselelerdi aiqyndaityn kelisimderdi ratifikatsiialaý jumystary júrgizilip jatyr.
Máýlen Áshimbaev Qasym-Jomart Toqaevqa Senatta múmkindigi shekteýli jandar úshin inkliýzivti qoǵamdyq orta qalyptastyrý máselesi boiynsha jumys toby qurylǵany týraly aitty. Bul jumys toby Ulttyq qoǵamdyq senim keńesiniń besinshi otyrysynyń qorytyndysy boiynsha Memleket basshysynyń tapsyrmasymen quryldy. Spikerdiń aitýynsha, zańnamaǵa engiziletin tiisti ózgerister men tolyqtyrýlar biyl Eńbek jáne halyqty áleýmettik qorǵaý, Densaýlyq saqtaý ministrlikterimen birlesip ázirlenedi.
Senat Tóraǵasy Memleket basshysyna senatorlardyń qatysýymen ótetin aldaǵy birqatar halyqaralyq is-sharalar jóninde málimet berdi.
