Qazaqstan halqy Assambleiasynyń keńeitilgen otyrysynda Memleket basshysy Qasym-Jomart Toqaev Fedor Dostoevskiidiń 200 jyldyǵyna arnalǵan ataýly is-shara uiymdastyrýdy usyndy, dep habarlaidy QazAqparat.
«Jetinshi – mádeniet dialogy jáne jalpyulttyq azamattyq patriotizm. Biz kún saiyn úilesimdi etnosaralyq ózara-is-qimyldyń jarqyn úlgilerin, túrli etnosqa kiretin el azamattarynyń patriotizm aktileri men jankeshti eńbegin kórip otyrmyz. Qazaqstanda etnikaaralyq dialog dástúriniń tamyry bereńde jatyr. Máselen, kórnekti zertteýshi Potanin Grigorii Alekseevichti «Alash» qairatkerleri qurmetti aqsaqal dep ataǵan. Potaninniń qazaq tilinde sóilegeni, halqymyzdyń mádenietin, turmysyn jáne tarihyn zerttegeni belgili. Qazaqtyń tanymal ǵalymy Shoqan Ýálihanovpen dostyq qarym-qatynasta bolǵan. Biyl IýNESKO qamqorlyǵymen Shoqan Ýálihanovtyń taǵy bir dosy, álem ádebietiniń klassigi Dostoevskii Fedor Mihailovichtiń 200 jyldyǵy atalyp ótedi. Menińshe, elimizdiń tarihi ortalyqtarynyń biri – Semeide osynaý datanyń kúnine orai ataýly is-shara uiymdastyrý kerek», - dedi Memleket basshysy.
QR Prezidentiniń atap ótýinshe, Dostoevskii Semei qalasynda 5 jyl boiy jumys istegen. Qalada jazýshynyń ádebi-memorialdy mýzeii ornalasqan. Osy mýzei úi búkil álem týristeri úshin mádeni-tanymdyq nysanǵa ainala alady.
«Mádenietterdiń bir-birimen aralasýynda shekara joq. Ol halyqty rýhani baiytady. Bul meniń nyq senimim. Qazaqstanda Aleksandr Pýshkinnen bastap «Edilde kazakpyn, Jaiyqta qazaqpyn» dep aitqan Nobel syilyǵynyń laýreaty Mihail Sholohovqa deiin orys ádebietiniń kóptegen klassigi shabyt alǵan edi», - dedi Qasym-Jomart Toqaev.
