Táýelsizdigimizdiń 30 jyldyǵy Májilis jáne máslihattar depýttarynyń sailaýymen bastalýynyń simvoldyq máni zor. Bul týraly «Nur Otan» partiiasynyń kezekten tys XX Sezinde QR Prezidenti Qasym-Jomart Toqaev aitty, dep habarlaidy QazAqparat.
«Táýelsizdigimizdiń 30 jyldyǵy Májilis jáne máslihattar depýttarynyń sailaýymen bastalmaq. Munyń simvoldyq máni zor. Bul doda barlyq mereitoilyq is-sharalarǵa ideologiialyq jáne mazmundyq turǵydan tyń serpin beretindigi anyq. Aldaǵy sailaý qoǵamnyń birtutastyǵyn jáne bereke-birligimizdi bekemdei túsedi dep senemin», - dedi Memleket basshysy.
QR Prezidenti bul naýqan ashyq, ádil ári zańdy ótýi úshin barlyq jaǵdaidyń jasalatyndyǵyn basa aitty.
«Men Memleket basshysy retinde muny jiti qadaǵalaimyn. Osyǵan orai Ortalyq sailaý komissiiasyna jáne Bas prokýratýraǵa naqty tapsyrma berdim. Barsha sailaýshylardy azamattyq belsendilik tanytyp, sailaýǵa qatysýǵa shaqyramyn. Elimizdiń igiligi jáne memleketimizdiń múddesi jolynda tabysqa birge jete bereiik. Otanymyz máńgi jasasyn! Halqymyz árqashanda aman bolsyn!», - dedi Qasym-Jomart Toqaev.
