Foto: Akorda.kz
Prezidenttiń qatysýymen Parlament Senatynyń otyrysy ótti, dep habarlaidy "Ult aqparat" Aqordanyń baspasóz qyzmetine silteme jasap.
Senat tóraǵasy Máýlen Áshimbaev otyrystyń kún tártibin jariialap, daýysqa saldy. Sodan keiin Qasym-Jomart Toqaev Parlament Senaty depýtattarynyń aldynda sóz sóiledi.
Memleket basshysy aldymyzda turǵan negizgi maqsat elimizdegi turaqtylyqty, qaýipsizdikti saqtap qalý, Qazaqstannyń jarqyn bolashaqqa qarai qarqyndy damýyna jol ashyp berý ekenin atap ótip, kelesi jyly barlyq saladaǵy reformalar jalǵasyn tabatynyn jetkizdi.
– Biyl elimiz zor qaterge tap boldy. Degenmen biz qiyndyqtyń bárin eńserdik. Barlyq salada júieli reformalardy qolǵa aldyq. Úsh jarym jyl buryn bastalǵan saiasi ózgerister biyl tyń qarqynmen jalǵasty. Reformanyń aýqymy keńeidi. Biz úshin bul ózgeristerdi jalpyulttyq dialog arqyly júzege asyrý óte mańyzdy. Osy máselege bailanysty Parlamenttiń róli áldeqaida joǵary bolmaq. Sondyqtan kele jatqan Parlamenttik sailaýǵa men ózim Memleket basshysy retinde airyqsha mán berip otyrmyn. Bul sailaý elimizdiń zańyna sáikes ádil jáne ashyq ótýge tiis, – dedi Prezident.
Sonymen qatar Qasym-Jomart Toqaev azamattardyń memleket basqarý isine qatysý múmkindigin birtindep arttyryp jatqanymyzdy jáne Konstitýtsiialyq reformalar arqyly kóptegen ózgeris jasaǵanymyzdy atap ótti.
– Kúshti Parlamenti bar Prezidenttik respýblika júiesine kóshtik. Prezidenttiń jaqyn týystaryna joǵary laýazymdardy ielenýge tyiym salyndy. Al Prezidenttiń ózi qyzmetin atqarǵan kezde eshbir partiiaǵa múshe bolmaýǵa tiis. Bul talap zań júzinde bekitildi. Memleket basshysy saiasi kúshterdiń bárinen tysqary turady. Endi Prezident 7 jyldyq merzimge bir ret qana sailanatyn boldy. Iaǵni, bilikti jeke-dara ielenýge jol berilmeidi. Joǵary laýazym ieleri aýysyp otyrady. Saiasi úderister ashyq, saiasi júie ornyqty bolady. Birqatar ókilettikter Prezidentten Parlamentke, ortalyqtan aimaqtarǵa berildi. Aralas sailaý júiesi engizildi. Parlamenttiń róli jáne mártebesi artty. Saiasi partiialardy tirkeý tártibi jeńildedi. Atalǵan mańyzdy ózgerister Konstitýtsiiaǵa engizildi. Elimizde jalpyulttyq referendým jáne Prezident sailaýy ótti. Jurtshylyq reformalardy qoldap, daýys berdi, – dedi Qasym-Jomart Toqaev.
Memleket basshysy adam quqyǵyn qorǵaý salasyna árdaiym airyqsha mán beretinine toqtalyp, sońǵy jyldary bul baǵytta aitarlyqtai ilgerileý bar ekenin aitty.
– Ólim jazasyna birjola tyiym saldyq. Turmystyq zorlyq-zombylyq jasaǵan adamdarǵa jaza qataidy. Sot reformasy júzege asyrylyp jatyr. Zań ústemdigi jáne qazylardyń derbes ári ádil bolýy – basty nazarda. Taǵy da qaitalap aitamyn: ádildik pen zańdylyqty qamtamasyz etý – memlekettiń mindeti. Qoǵam bizden osyny kútip otyr. Sondyqtan biyl adam quqyǵyn qorǵaý júiesin jetildirý jumysy jalǵasty. Adam quqyqtary jónindegi ýákilge konstitýtsiialyq kepildik jáne immýnitet berildi. Bas prokýrordyń quqyq qorǵaý quzyreti kúsheitildi. Konstitýtsiialyq Sottyń qurylýy asa mańyzdy qadam boldy. Bul organ jańa jyldan bastap jumysqa kirisedi. Ol Ata zań normalarynyń qatań saqtalýyn qamtamasyz etedi. Konstitýtsiialyq Sot azamattardyń quqyqtary men bostandyqtaryn qorǵaý isine zor úles qosady dep senemin, – dedi Memleket basshysy.
Prezidenttiń aitýynsha, bul bastama azamattarymyzdyń óz quqyǵy men erkindigin qorǵaýyna jańa múmkindik beredi. Konstitýtsiialyq sottyń mundai modeli damyǵan elderdiń kópshiliginde qoldanylady jáne Konstitýtsiianyń ústemdigin ornatýǵa yqpal etedi.
– Azamattardyń konstitýtsiialyq quqyqtarynyń buzylýyna qatysty ótinishterimen jii ainalysatyn Bas prokýror men Adam quqyqtary jónindegi ýákil de Konstitýtsiialyq Sotqa júgine alady. Qarasha aiynda Parlament «Konstitýtsiialyq Sot týraly» Konstitýtsiialyq zań qabyldady, ol onyń jumys tártibin retteidi jáne konstitýtsiialyq is júrgizý printsipterin anyqtaidy. Qazirgi ýaqytta Konstitýtsiialyq Sot apparatyn reformalaý jumystary aiaqtalyp keledi, – dedi Memleket basshysy.
Prezident Konstitýtsiialyq Sottyń kadrlyq quramyn jasaqtaý kezinde sabaqtastyq saqtalýǵa tiis ekenin aita kelip, jańa organnyń tóraǵasyna airyqsha mindet júkteletinine nazar aýdardy. Osy rette Memleket basshysy osy jaýapty qyzmetke Elvira Ábilhasymqyzy Azimovany usyndy.
– Elvira Ábilhasymqyzy – tájiribeli, bilikti maman. Zań shyǵarý jumysyn, halyqaralyq quqyq salasyn óte jaqsy biledi. Ol 20 jyldan astam ýaqyt Ádilet ministrliginde eńbek etti. Qatardaǵy qyzmetkerden ministrdiń orynbasary laýazymyna deiin kóterildi. 2019 jyldan beri Adam quqyqtary jónindegi ýákil qyzmetin atqaryp keledi. Sizderden Elvira Ábilhasymqyzy Azimovany Adam quqyqtary jónindegi ýákil laýazymynan bosatyp, Konstitýtsiialyq sottyń tóraǵasy laýazymyna taǵaiyndaýǵa kelisim berýdi suraimyn, – dedi Memleket basshysy.
Senat depýtattary ashyq daýys berý arqyly Elvira Ábilhasymqyzy Azimovanyń kandidatýrasyn biraýyzdan qoldady.
Sonymen qatar Qasym-Jomart Toqaev Adam quqyqtary jónindegi ýákil laýazymyna Artýr Ermekuly Lastaevtyń kandidatýrasyn usyndy. Senat depýtattary Prezident usynǵan kandidatýrany biraýyzdan qoldady.
