Memleket basshysy Qasym-Jomart Toqaev Qyrǵyz Respýblikasynyń jańadan sailanǵan Prezidenti Sadyr Japarovpen telefon arqyly sóilesti, dep habarlaidy Aqorda.
Qasym-Jomart Toqaev Sadyr Japarovty sailaýdaǵy jeńisimen quttyqtap, daýys berý nátijesi ol usynǵan Qyrǵyzstannyń áleýmettik-ekonomikalyq turaqty damýyn qamtamasyz etý jáne memlekettiligin odan ári nyǵaitý baǵdarlamasy búkilhalyqtyq qoldaýǵa ie bolǵanynyń kýási ekenin atap ótti.
Qazaqstan Prezidenti baýyrlas Qyrǵyzstanmen aradaǵy yntymaqtastyqty eki el halqynyń múddesine sáikes dostyq, tatý kórshilik jáne strategiialyq áriptestik rýhynda odan ári damyta berýge beiildi ekenin naqtylady.
Sadyr Japarov Qyrǵyz Respýblikasynyń turaqty ári baiypty damýǵa baǵyttalǵan umtylysyn únemi qoldap kele jatqan Memleket basshysy men Qazaqstan halqyna alǵys aitty.
Prezidentter ekijaqty bailanystardyń kún tártibindegi barlyq máseleler boiynsha birlesip jumys isteýge daiyn ekenderin, sondai-aq, halyqaralyq uiymdar sheńberindegi is-qimyldardy arttyrýǵa niettiligin rastady.
Qasym-Jomart Toqaev Sadyr Japarovty Qazaqstanǵa resmi saparmen kelýge shaqyrdy. Qyrǵyz basshysy shaqyrýdy qabyl alyp, Prezident retindegi alǵashqy saparyn Qazaqstannan bastaitynyn aitty. Sonymen qatar ol Memleket basshysyn Parlament sailaýynyń sátti ótýimen quttyqtady.
Qasym-Jomart Toqaev Sadyr Japarovqa baýyrlas Qyrǵyzstan halqynyń igiligi jolyndaǵy jaýapty memlekettik qyzmetine tolaǵai tabys tiledi.
