Foto: Akorda.kz
Memleket basshysy Qasym-Jomart Toqaev Respýblika kúni qarsańynda Aqordada bir top azamatqa memlekettik nagradalar men syilyqtar tapsyrdy, - dep habarlaidy "Ult aqparat" Aqordanyń resmi saityna silteme jasap.
Prezident, eń aldymen, saltanatty jiynǵa qatysýshylardy elimizdiń eń basty meiramy – Respýblika kúnimen quttyqtady.
– Bul – qazaqtyń memlekettilik dástúri qaita jańǵyrǵan tarihi kún. Kók túrikter dáýirinen, Altyn Orda, Qazaq handyǵy zamanynan kele jatqan eldigimiz tamyryn tapqan kún. Bul – Alash arystarynyń azattyq jolyndaǵy arpalysy aqtalǵan kún. Halqymyzda «Egemen bolmai, el bolmas» degen sóz bar. Osydan 33 jyl buryn tarihi ádildik ornady. Qazaqstannyń Memlekettik egemendigi týraly deklaratsiia qabyldandy. Osy mańyzdy qujat jurtymyzdyń azattyq alýyna jol ashty. Aqjoltai qujat jurtymyzdyń talap-tilegine sai jazyldy, otanshyl azamattardyń aqyl-parasatynyń arqasynda qabyldandy. Olardyń syn saǵattaǵy batyldyǵyn naǵyz erlik dep baǵalaýǵa bolady. Biz qazir Ádiletti Qazaqstandy quryp jatyrmyz. Sondyqtan ótken zamannyń qairatkerlerine, olardyń eńbegine laiyqty, ádiletti baǵa berip otyrýymyz kerek, – dedi Memleket basshysy.
Qasym-Jomart Toqaev elimizdiń jetistikteri týraly aita kele, adam kapitalyn jaqsartýǵa baǵyttalǵan oń ózgeristerge nazar aýdardy.
– Kóp uzamai halqymyzdyń sany 20 millionǵa jetedi. Bul elimizdiń turaqty damýynyń aiqyn kórinisi deýge bolady. Bir sózben aitqanda, azamattarymyz óz urpaǵynyń jarqyn bolashaǵyna jáne elimizdiń erteńine senimmen qaraidy. «Ulttyq qor – balalarǵa» bastamasyn júzege asyrý úshin tiisti zań qabyldandy. Nebári eki aidan keiin balalarymyzdyń esep-shotyna qarjy túse bastaidy, – dedi Memleket basshysy.
Prezident aimaqtardy jan-jaqty damytý máselesin memlekettik saiasattaǵy mańyzdy baǵyttyń biri retinde atap ótti.
– «Qýatty aimaqtar – qýatty memleket» degenimiz – jalań uran emes. Bul – Ádiletti Qazaqstandy qurýǵa qajetti eń basty qaǵidat. Biz byltyr elimizdiń ákimshilik-aýmaqtyq qurylymyna birqatar ózgeris engizdik. Sol arqyly keibir oblystyń damýyna tyń serpin berdik. Meniń tapsyrmammen aýyl-aimaqty damytý tujyrymdamasy qabyldandy. Bul qujattyń mán-mańyzy zor. Aimaqtarda áleýmettik, injenerlik jáne kólik infraqurylymyn qurý – basty mindet. «Aýylda densaýlyq saqtaýdy jańǵyrtý» ulttyq jobasy bastaldy. Osy jobanyń aiasynda 655 ambýlatoriia jáne feldsherlik-akýsherlik nysan salynady, qural-jabdyqpen tolyq qamtamasyz etiledi. Buǵan qosa 20 aýdanaralyq kópbeiindi emhana ashylady, al 12 emhana zaman talabyna sai jańarady. Iaǵni, tórt millionnan astam aýyl azamatyna sapaly dárigerlik qyzmet kórsetiledi. Elimizde «Jaily mektep» jobasy qolǵa alyndy. 2026 jylǵa deiin barlyq aimaqta júzdegen jańa mektep boi kóteredi. Aýyldarda 100 sport ortalyǵy ashylady. Sondai-aq 650 mádeniet oshaǵy salynady jáne jóndeledi, – dedi Qasym-Jomart Toqaev.
Prezident Qazaqstannyń «eldiń ishinde de, ainalasynda da beibitshilik», «áralýandyq arqyly – birlikke» degen qaǵidattardy árdaiym berik ustanatynyn málimdedi. Onyń aitýynsha, Qazaqstannyń aldynda buryn-sońdy bolmaǵan jańa syn-qaterler tur. Osy kúrdeli kezeńde memleketimizdiń ornyqty damýy óte mańyzdy. Biz bolashaqqa senimmen qaraǵan birtutas Qazaq elin kúlli álemge tanytýymyz kerek.
– Egemendikke qol jetkizý ońai emes, al ony saqtap turý tipti qiyn. Shyn máninde, Táýelsizdik – bárinen qymbat. Táýelsizdikti saqtaý, bul – eń aldymen, tutas ulttyń jaýapkershiligi. Biz egemendikti tynymsyz eńbekpen, myzǵymas birlikpen kún saiyn qorǵaýymyz kerek. Eń bastysy, elimizdegi turaqtylyqty saqtaýymyz qajet. Sebebi tynyshtyq bolmasa, basqanyń bári beker. Álemdegi ahýaldyń qandai kúrdeli ekenin kórip otyrsyzdar. Bedeldi halyqaralyq sarapshylar Qazaqstandy beibitshiliktiń besigi dep ataidy. Qazir biz aimaqtyń mádeni-rýhani ortalyǵyna ainaldyq. Biyl sheteldiń óner ujymdary elimizde 200-den astam mádeni is-shara ótkizdi. Bul – turaqtylyqtyń, tynyshtyqtyń aiqyn kórinisi. Muny basqalarǵa úlgi-ónege deýge bolady. Al turaqsyzdyq jailaǵan elge eshkim umtyla qoimasy anyq. Beibitshilik – bizdiń basty bailyǵymyz. Onyń qadirine jetip, baǵalai bilý – bárimizge ortaq paryz. Muny elimizdiń árbir azamaty, ásirese, óskeleń urpaq tereń túsinýi qajet, – dedi Memleket basshysy.
Prezident «Adal azamat» uǵymyna airyqsha toqtalyp, jastarǵa arnaiy úndeý joldady.
– Elimizde júzege asyrylyp jatqan árbir bastama, eń aldymen, sizderge arnalady. Qazirgi reformalardyń igiligin kóretin de, eldik isterdi jalǵastyratyn da – sizder. Búgingi jastardy Qazaqstannyń kelbeti deýge bolady. Shyn máninde, kez kelgen memleketti turǵyndaryna qarap baǵalaidy. Iaǵni, bizdiń qandai el bolarymyz óskeleń urpaqqa bailanysty. Sondyqtan jastarymyz otanshyl, bilimpaz, eńbekqor, únemshil, ádil ári janashyr bolýy qajet. Jastar sportpen, dene shynyqtyrýmen ainalysýy kerek. Men muny únemi aityp júrmin. Osy qundylyqtardy barynsha nasihattap, taratý qajet. Sonda jeke adamnyń qasieti tutas ulttyń qasietine ainalady. Jastar kez kelgen ózgeriske beiim bolady. Ár nárseni boiyna tez sińiredi. Men sizderdi jaqsydan úirenýge, jamannan jirenýge shaqyramyn. Uly Abai aitqan bes nárseden qashyq, bes nársege asyq bolyńyzdar. Sizder dáriptegen qundylyqtar qoǵamda tez ornyǵady. Sizder qoldaǵan ózgerister jyldam júzege asady. Bárimizdiń tilegimiz – bir, bul – qoǵamymyzda jappai ádilettik ornatý. Endeshe, maqsatymyzǵa birge jeteiik, – dedi Qasym-Jomart Toqaev.
Prezident memlekettilik tuǵyryn nyǵaita túsý úshin zań ústemdigin ornyqtyrý óte mańyzdy dep sanaidy. Memleket basshysynyń aitýynsha, Ádiletti Qazaqstandy qurý úshin quqyqtyq mádenietti damytý qajet.
– Zańsyzdyq, tártipsizdik, mádenietsizdik eldi jarǵa jyǵady. Mundai jaǵymsyz úrdisterge búkil qoǵam bolyp qarsy turýymyz kerek. Al tártipke baǵynǵan qoǵam órkenietti bolady. Bul – zańdylyq. Ár azamat elimizdiń zańyn qurmettese, bereke-birlik te, baqýatty turmys ta bolady. Iaǵni, Zań tolyǵymen oryndalsa, tórt qubylamyz túgel bolmaq, – dedi Memleket basshysy.
Prezident sózin qorytyndylai kele, elimizdiń damýyna eleýli úles qosqan bir top azamatqa joǵary memlekettik nagradalar, syilyqtar men ataqtar tabys etti.
Memleket basshysy Qasym-Jomart Toqaevtyń sóilegen sóziniń tolyq mátinimen myna silteme arqyly tanysýǵa bolady.
