UQShU-nyń mereitoilyq sammitinen keiin Memleket basshysy Qasym-Jomart Toqaev Resei Prezidenti Vladimir Pýtinmen kezdesý ótkizdi, - dep habarlaidy "Ult aqparat" Aqordaǵa silteme jasap.
Prezidentter kún tártibindegi ekijaqty ózekti máselelerdi, sondai-aq saýda-ekonomikalyq saladaǵy Qazaqstan-Resei yntymaqtastyǵyn talqylady.
– Shyn máninde, elderimiz arasyndaǵy saýda-ekonomikalyq jáne saiasi yqpaldastyqtyń qarqyny nashar deýge esh negiz joq. Taýar ainalymy 25 milliard dollarǵa jetti. Resei – Qazaqstan úshin saýda-ekonomikalyq saladaǵy basty seriktes. Sol sebepti, men, Úkimetimizge osy qarqyndy jáne saýda men investitsiialar kólemin saqtap qana qoimai, qazirgi geosaiasi jaǵdaidaǵy barlyq qiyndyqtarǵa qaramastan, olardy arttyrý jóninde mindet júkteimin. Men ózimmen birge osy salaǵa jaýapty Premer-ministrdiń birinshi orynbasary bastaǵan Úkimettiń negizgi sheneýnikterin ala keldim. Olar tabysty kelissózder júrgizdi jáne naqty nátijege qol jetkizý úshin olardyń aldyna Resei Federatsiiasynyń Úkimetimen iskerlik baǵytta jumys isteý mindeti qoiyldy, – dedi Qasym-Jomart Toqaev.
Qazaqstan Prezidenti búginde mashina jasaý, metallýrgiia, himiia ónerkásibi siiaqty salalarda jalpy quny 4 milliard dollar bolatyn 20 iri jobanyń ártúrli satyda júzege asyrylyp jatqanyn aitty.
Resei Prezidenti óz kezeginde eki el arasyndaǵy saýda-ekonomikalyq yntymaqtastyqty damytýdyń oń qarqynyn atap ótti.
– Jalpy bizde barlyq sala jaqsy damyp keledi. Byltyr taýar ainalymynyń ósimi 34 paiyz boldy. Resei kompaniialary Qazaqstan ekonomikasyna 17 milliard dollar investitsiia saldy. Bárimizge túsinikti ári belgili qazirgi qiynshylyqtarǵa qaramastan, jaǵdai jaqsy damýda, – dedi Vladimir Pýtin.
Taraptar kún tártibindegi ekijaqty keshendi ekonomikalyq máselelerdiń bárin biyl kúzde Orynborda ótkizýge josparlanǵan Aimaqaralyq forýmda talqylaýǵa ýaǵdalasty.
Qasym-Jomart Toqaev Vladimir Pýtinniń shaqyrýy boiynsha biylǵy maýsym aiynda Peterbýrgte ótetin ekonomikalyq forýmǵa qatysatynyn naqtylady. Sonymen qatar Qazaqstannyń úkimettik delegatsiiasy Ekaterinbýrgte ótetin iri ónerkásiptik kórmege qatysýdy josparlap otyr.
