Memleket basshysy Qasym-Jomart Toqaev Prezident sailaýyna qoǵamdyq-saiasi kúshterdiń úlken koalitsiiasy atynan qatysýdy josparlap otyrǵanyn málimdedi, - dep habarlaidy "Ult aqparat" Aqordanyń baspasóz qyzmetine silteme jasap.
"Ózderińizge málim, men elimizdegi eń iri AMANAT partiiasynyń Tóraǵasy qyzmetinen bas tarttym. Konstitýtsiialyq reforma nátijesinde Prezidentke óziniń ókilettigin atqarý kezinde partiia qatarynda bolýǵa tyiym salyndy. Aldaǵy sailaýǵa qandai uiymnyń atynan qatysatynyma qoǵam qyzyǵýshylyq bildirip otyrǵanyn bilemin. Ashyǵyn aitaiyn, maǵan ártúrli respýblikalyq birlestikter men partiialardan ózderiniń atynan úmitker bolý týraly usynystar túsip jatyr. Ásirese, jastar jáne basqa da qoǵamdyq uiymdardyń bastama kóterip jatqanyna qýandym. Osynyń barlyǵy azamattardyń keiingi úsh jarym jylda júzege asyrylyp kelgen reformalar men ózgeristerge qoldaýdyń aitarlyqtai artqanyn kórsetedi", - dedi Memleket basshysy.
Prezident jasaǵan usynysy men senimi úshin, strategiialyq baǵytyna belsendi qoldaý kórsetkeni úshin bárine alǵys aitty.
"Men belgili bir uiymnan emes, elimizde júrgizilip jatqan reformalardyń áleýmettik negizin qalyptastyratyn qoǵamdyq-saiasi kúshterdiń úlken koalitsiiasynyń atynan sailaýǵa qatysqanym durys bolady dep oilaimyn.
Sondai-aq, bul Memleket basshysynyń túrli partiialardan, birlestikterden teń araqashyqtyq saqtaý qaǵidatyn nyǵaitýǵa múmkindik beredi. Sailaý naýqanyn zańdardy qatań saqtai otyra ótkizýdi qamtamasyz etý mańyzdy. Men Memleket basshysy retinde prezident sailaýynyń ádil ári ashyq ótetinine kepildik beremin", - dedi Toqaev.
