Foto: Aqorda
Memleket basshysy Germaniia Federaldyq kantsleri Olaf Sholtspen keńeitilgen quramda kelissóz júrgizdi. Qasym-Jomart Toqaev pen Olaf Sholts resmi delegatsiia músheleriniń qatysýymen keńeitilgen quramda kelissóz ótkizdi, dep habarlaidy "Ult aqparat" Aqordaǵa silteme jasap.
Prezident Kantslerdiń elimizge jasaǵan alǵashqy resmi saparynyń máni zor ekenin atap ótip, búgingi kezdesý Qazaqstan men Germaniianyń kópqyrly yntymaqtastyǵyn jańa deńgeige kóteretinine senim bildirdi.
"Biz jańa ǵana shaǵyn quramda ekijaqty qarym-qatynasty odan ári nyǵaitý máselesin talqyladyq. Saýda-ekonomika, investitsiia salalaryndaǵy yqpaldastyqty tereńdetýge erekshe nazar aýdaryldy. Budan bólek, ózekti halyqaralyq máseleler týraly sóz qozǵadyq. Atap aitqanda, qazirgi geosaiasi ahýalǵa, jahandyq qaýipsizdikke jáne aimaqtyq damýǵa, klimattyń ózgerýine qatysty pikir almastyq. Sondai-aq halyqaralyq uiymdar aiasyndaǵy yqpaldastyq máselesin qarastyrdyq. Ekijaqty qarym-qatynastar strategiialyq seriktestik rýhynda damyp keledi. Búgingi kelissózder onyń aiasyn keńeite túsýge yqpal etetinine senimdimin", – dedi Qasym-Jomart Toqaev.
Memleket basshysynyń aitýynsha, Germaniia Qazaqstannyń negizgi saýda seriktesteriniń biri jáne ekonomikamyzǵa investitsiia salǵan jetekshi elderdiń sanatyna kiredi.
"Byltyr ekijaqty taýar ainalymy 1,5 esedei ósip, 4 milliard dollarǵa jýyqtady. Biyl da oń dinamika baiqalyp otyr. Sońǵy jeti aida ózara saýda-sattyq kólemi 2,3 milliard dollardan asty. 2005 jyldan beri Germaniiadan shamamen 6,7 milliard dollar kóleminde tikelei investitsiia tartyldy. Bul qarjynyń 90 paiyzy shikizattyq emes sektorǵa tiesili ekeni qýantady. Búginde Qazaqstanda nemis kapitalynyń úlesi bar myńnan astam kompaniia jumys isteidi", – dedi prezident.
Germaniianyń Federaldyq kantsleri qazaq jerinde kórsetilgen syi-qurmet úshin Qasym-Jomart Toqaevqa alǵys aityp, ekijaqty bailanystardyń qarqyndy damyp kele jatqanyna toqtaldy.
"Sizdiń elińizge tikelei investitsiia salý jáne saýda ainalymynyń kólemin arttyrý úshin ekonomikalyq bailanystarymyzdy jaqsartýǵa barlyq jaǵdaidy jasaimyz. Árine, ekonomikalyq yntymaqtastyqty barlyq salada damytqymyz keledi. Energetika salasyndaǵy seriktestigimiz dáiekti túrde alǵa jyljyp kele jatqanyna dán rizamyz. Eki el arasynda senimdi ári júieli yntymaqtastyq ornaǵan. Bul – búkil álemge jaqsy úlgi. Sondai-aq bizdiń aldymyzda turǵan halyqaralyq syn-qaterler tóńireginde jan-jaqty pikir almasqanymyzǵa qýanyshtymyz", – dedi Olaf Sholts.
Taraptar ózara tiimdi saýda-ekonomikalyq yntymaqtastyqty arttyrýǵa, ásirese, energetika, "jasyl" transformatsiia, taý-ken ónerkásibi, kólik-logistika, klimatty qorǵaý, ekologiia jáne aýyl sharýashylyǵy salalaryndaǵy yqpaldastyqty kúsheitýge múddeli ekenin rastady.
Sondai-aq qazaq-german mádeni-gýmanitarlyq bailanystaryn nyǵaitý perspektivasy qarastyryldy.
Kelissózder qorytyndysy boiynsha prezident Qasym-Jomart Toqaev pen Federaldyq kantsler Olaf Sholts Qazaqstan Respýblikasy men Germaniia Federativtik Respýblikasy arasyndaǵy yntymaqtastyq týraly Birlesken deklaratsiia qabyldady.
Sonymen qatar resmi delegatsiia músheleri mynadai qujattarǵa qol qoidy:
- 1. Qazaqstan Respýblikasynyń Ulttyq banki men Doiche Býndesbank arasyndaǵy Ortalyq bankter yntymaqtastyǵynyń tehnikalyq máseleleri jónindegi ózara túsinistik týraly memorandým;
- 2. Qazaqstan Respýblikasynyń Ǵylym jáne joǵary bilim ministrligi men Germaniia Federativtik Respýblikasynyń Federaldyq Syrtqy ister ministrligi arasyndaǵy D.Serikbaev atyndaǵy Shyǵys Qazaqstan tehnikalyq ýniversiteti janynan Qazaqstan-Nemis ǵylym jáne tehnologiialar institýtyn qurý jónindegi niet týraly memorandým;
- 3. Qazaqstan Respýblikasynyń Oqý-aǵartý ministrligi, "Samuryq-Qazyna" ulttyq ál-aýqat qory" aktsionerlik qoǵamy men «Vozrojdenie» qazaqstandyq nemister birlestigi" qoǵamdyq qory jáne Germaniia Federativtik Respýblikasynyń Federaldyq Syrtqy ister ministrligi arasyndaǵy qazaq-nemis mektebin qurý nieti týraly memorandým.
