Foto: Akorda.kz
Qazaqstan Prezidenti Qasym-Jomart Toqaev pen Majarstan Premer-ministri Viktor Orban kelissózder qorytyndysy boiynsha buqaralyq aqparat quraldarynyń ókilderi úshin brifing ótkizdi, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy búgin Premer-ministr Viktor Orbanmen strategiialyq seriktestikti odan ári tereńdetýge baǵyttalǵan nátijeli kelissóz júrgizgenin aitty.
– Jan-jaqty ári tiimdi yqpaldastyqty nyǵaitý halyqtarymyzdyń múddesine sai keledi. Biz búgin naqty ári mańyzdy kelisimderge qol jetkizdik. Ásirese ekijaqty saýda-sattyq kólemin ulǵaitýǵa jáne investitsiialyq yntymaqtastyqty damytýǵa basa mán berdik. Osy oraida taýar túrin kóbeitip, jańa múmkindikterdi paidalaný asa mańyzdy. Qazir elimiz Majarstanǵa quny shamamen 700 million dollar bolatyn 95 túrli taýar jetkize alady. Energetika, metallýrgiia, munai-himiia, mashina jasaý, aýyl sharýashylyǵy jáne qurylys salalary boiynsha ónim eksporttaýǵa múmkindik bar, – dedi Qasym-Jomart Toqaev.
Prezident kelissóz barysynda investitsiialyq seriktestikti odan ári jandandyrý úshin iri jobalardy birlesip júzege asyrý jóninde ýaǵdalastyqqa qol jetkizilgenin málimdedi.
– Ózara tiimdi jobalar tizimi ázirlenedi. Jalpy osy ýaqytqa deiin biraz sharýa atqaryldy. Jyl sońyna qarai Batys Qazaqstandaǵy «Rojkovskoe» iri gaz kondensatty ken orny ashylady. Onda Majarstannyń «MOL» munai-gaz kompaniiasynyń úlesi 192 million dollar bolmaq. Sondai-aq «Globalia» kásiporny elimizdiń birqatar aimaǵynda kún energiiasy stantsiialaryn salýdy josparlap otyr. Jobanyń quny – 150 million dollar. Budan bólek kelesi aptada Astanada eki el kásipkerleriniń qatysýymen biznes-forým ótedi, – dedi Qasym-Jomart Toqaev.
Sonymen qatar taraptar kólik-logistika, atom energetikasy, sý resýrstaryn basqarý, sirek kezdesetin metal óndirý baǵytyndaǵy yntymaqtastyqty nyǵaitý máselelerin talqylady.
Memleket basshysynyń aitýynsha, eki el arasynda qarjy salasyndaǵy bailanystar da qarqyndy damyp keledi.
– Jaqynda «Equilibrium Capital» kompaniiasy Astana halyqaralyq qarjy ortalyǵynda sheteldik qorlardy basqarý mártebesine ie boldy. Bul – osyndai mártebege qol jetkizgen Majarstannyń alǵashqy kompaniiasy. Kásiporyn jasyl energetika jáne densaýlyq saqtaý salalaryndaǵy jobalardy qarjylandyra alady. Kompaniianyń Qazaqstanda 3 investitsiialyq qor qurýǵa nieti bar, – dedi Qasym-Jomart Toqaev.
Prezident mádeni-gýmanitarlyq yntymaqtastyqty qazaq-majar qatynastarynyń altyn kópiri retinde atap ótip, bul baǵytta aitarlyqtai jetistikter bar ekenine nazar aýdardy.
– Majar úkimetiniń qoldaýymen sońǵy 10 jylda Qazaqstan stýdentteri úshin oqý granttary bólinip keledi. Kóptegen jastarymyz Majarstannyń jetekshi joǵary oqý oryndarynda bilim alýda. Jańa ǵana osy baǵdarlamany jalǵastyrý týraly Memorandýmǵa qol qoiyldy. Bul bilim salasyndaǵy bailanystardy odan ári tereńdetýge jol ashady. Biyl majar halqynyń uly perzenti Shandor Petefidiń týǵanyna 200 jyl tolýyna orai búgin Astanada jańa kóshege aqynnyń esimi beriledi, – dedi Prezident.
Memleket basshysy kelissóz barysynda jahandyq mańyzy bar máseleler boiynsha pikir almasqanyn, bul rette eki eldiń ustanymdary ortaq nemese orailas ekenin atap ótti.
Prezidenttiń aitýynsha, eki eldiń seriktestigi BUU, Túrki memleketteri uiymy, EQYU siiaqty qurylymdar aiasynda tabysty damyp kele jatyr.
Óz kezeginde Majarstan Premer-ministri osydan toǵyz jyl buryn qazaq-majar qatynastaryn strategiialyq deńgeige jetkizý týraly sheshim qabyldanǵanyn aitty.
– Sońǵy jyldary bul baǵytta kóptegen nátijeli is atqaryldy. Eki el arasyndaǵy taýar ainalymy edáýir qarqyn alǵanyn kórip otyrmyz. Muny joǵary baǵalaimyz. Ekonomikalyq bailanystardy anaǵurlym joǵary deńgeige kóterý úshin berik negiz qaladyq. Majarstan halqy sizdermen týystyq bailanysy bar ekenin biledi. Qazaqtar – ortaq tarihymyzdyń bir bólshegi. Elderimiz arasynda saiasi dostyqtan bólek, ekonomikalyq yqpaldastyq nyǵaiyp kele jatqanyna qýanyshtymyz. Biz Eýropadaǵy teńizge shyǵatyn joly joq memleket retinde kóp nárseni syrttan alamyz. Majarstanǵa Resei men Qazaqstan munaiy eksporttalady. Ázirge munai kólemi sonshalyqty úlken emes. Áitse de tasymaldaý arnasy bar. Bul – elimizdiń qaýipsizdigi turǵysynan óte mańyzdy qadam, – dedi Viktor Orban.
Sonymen qatar Viktor Orban Majarstan kompaniialarynyń Qazaqstanda munai-gaz, jasyl energetika jobalaryn birlese júzege asyrýyna jáne atom salasyna maman daiarlaý isine atsalysýyna múmkindik jasaǵany úshin Qasym-Jomart Toqaevqa alǵys aitty.
