Foto: Akorda.kz
Qazaqstan men Ózbekstan prezidentteri shaǵyn quramda kelissóz júrgizdi, dep habarlaidy "Ult aqparat" Aqordanyń resmi saityna silteme jasap.
Prezident Qasym-Jomart Toqaevty halyqaralyq kongress ortalyǵynda resmi qarsy alý rásimi ótti. Sodan keiin qurmet qaraýylynyń bastyǵy eki el basshylaryna raport berip, Qazaqstan men Ózbekstannyń ánurandary oryndalǵannan keiin Qasym-Jomart Toqaev pen Shavkat Mirziioev bir-birine resmi delegatsiialardyń quramyn tanystyrdy.
Budan soń memleketter basshylary shaǵyn quramda kelissóz júrgizdi. Qazaqstan Prezidenti qonaqjailyq kórsetip qarsy alǵan Shavkat Mirziioevke rizashylyǵyn bildirip, memlekettik sapardyń mańyzdylyǵyn atap ótti.
– Biz Ózbekstanmen yntymaqtastyqty odan ári nyǵaitýǵa múddelimiz. Qazaq pen ózbek – ejelden dostyǵy myzǵymas, syilastyǵy jarasqan baýyrlas halyqtar. Eki eldiń salt-dástúri, mádenieti, tili, dini uqsas. Tarihy tamyrlas, taǵdyrlas elderimizdiń maqsat-muraty da ortaq. Sondyqtan men búgingi saparǵa airyqsha mán beremin. Biz tatý kórshilikke jáne senimdi seriktestikke negizdelgen qarym-qatynasty jańa deńgeige kóteremiz dep senemin. Qazaqstan men Ózbekstan arasyndaǵy yntymaqtastyq neǵurlym tyǵyz jáne tabysty bolsa, Ortalyq Aziiadaǵy ahýal soǵurlym turaqty bolady, – dedi Qasym-Jomart Toqaev.
Sonymen qatar Memleket basshysy Ózbekstan Prezidentiniń Joldaýymen tanysqanyn jáne bul mańyzdy qujat Ózbekstannyń odan ári tabysty damýyna jol ashatynyn jetkizdi.
Shavkat Mirziioev óz kezeginde Qazaqstan Prezidentin sailaýdaǵy jeńisimen quttyqtap, Ózbekstanǵa memlekettik saparmen kelý týraly shaqyrýyn qabyl alǵany úshin rizashylyǵyn bildirdi. Ózbekstan Prezidentiniń aitýynsha, Qasym-Jomart Toqaevtyń bul sapary eki el qarym-qatynastarynyń damýyna tyń serpin berip, qol qoiylatyn qujattar naqty is-áreketterge berik negiz bolady.
Prezidentter saiasi, saýda-ekonomikalyq jáne mádeni-gýmanitarlyq salalardy keńeitýge kóńil bólip, qazaq-ózbek strategiialyq seriktestiginiń aýqymdy máselelerin talqylady. Atap aitqanda, eki el – Ortalyq Aziiadaǵy eń iri saýda seriktester. Biyl saýda ainalymy 35 paiyzǵa ósip, 5 milliard dollarǵa jýyqtady. Mundai kórsetkishke ónerkásip, mashina jasaý, logistika, kólik, energetika jáne basqa da salalarda birlesken jobalardy júzege asyrý arqyly qol jetkizilgenine nazar aýdaryldy.
Sondai-aq taraptar jahandyq jáne aimaqtyq kún tártibindegi ózekti máselelerdi talqylady.
