Memleket basshysy Qasym-Jomart Toqaev Ózbekstan Prezidenti Shavkat Mirzieiovpen telefon arqyly sóilesti, dep habarlaidy "Ult aqparat" Aqordanyń baspasóz qyzmetine silteme jasap.
Áńgimelesý barysynda Qazaqstan Prezidenti Syrdariia oblysyndaǵy Sardoba sý qoimasy bógetiniń buzylý saldaryn joiý jónindegi Ózbekstannyń qolǵa alǵan is-qimyldaryn joǵary baǵalap, baýyrlas ári tatý kórshi ózbek halqyna kómek kórsetýge daiyn ekenin jetkizdi.
Shavkat Mirzeiov Qasym-Jomart Toqaevqa qoldaý bildirgeni úshin alǵys aityp, atalǵan apat Qazaqstannyń ońtústigindegi birqatar eldi mekenge de ziian tigizgenine ókinish bildirdi. Osyǵan orai Ózbekstan Prezidenti sý tasqynynan zardap shekken aýdandardy tezirek qaita qalpyna keltirý maqsatynda birlesken sharalar qabyldaýǵa nietti ekenin aitty.
Memleketter basshylary qalyptasqan jaǵdaiǵa orai týyndaǵan barlyq máseleni shuǵyl sheshý úshin eki eldiń Úkimetteri deńgeiindegi úilesimdi jumystyń mańyzdylyǵyn atap ótti. Sonymen qatar taraptar COVID-19 virýsyna qarsy kúreste eki eldiń atqaryp jatqan tiimdi ári júieli jumystaryna kóńilderi tolatynyn aityp, sonyń arqasynda indettiń keń taralýyna jol berilmegenine toqtaldy.
Osy rette taraptar pandemiianyń Qazaqstan men Ózbekstan arasyndaǵy saýda-ekonomikalyq qatynastarǵa keri áserin boldyrmaý maqsatynda ekijaqty yqpaldastyqty jandandyrý qajettigine nazar aýdardy. Atap aitqanda aýyl sharýashylyǵy, mashina jasaý, jeńil ónerkásip jáne taǵy basqa salalardaǵy eksport áleýetin arttyrý úshin birlesken óndiris oryndaryn ashý týraly ýaǵdalastyqqa qol jetkizildi.
Qazaqstan tarapynyń bastamasymen bolǵan áńgimelesý jyly jáne dostyq ráýishte ótti.
Esterińizge sala keteiik, 1 mamyrda Sardoba sý qoimasy bógetin sý shaiyp ketýine bailanysty Ózbekstannyń Syrdariia oblysyndaǵy eldimekendi sý basty. Sonyń saldarynan Maqtaaral aýdanynda shekara mańyndaǵy birneshe kollektor sýǵa tolyp qalǵan. Maqtaaraldaǵy ortalyq kollektordan sý syrtqa jaiylyp, Jeńis, Jańaturmys aýyldaryn sý alyp ketti. Oblystyq mańyzy bar «Myrzakent - Jeńis - Jańa turmys» avtomobil jolyn sý basyp, kólik júre almaýda. Tórt aýyldan 5400 adam qaýipsiz jerge kóshirilgen. Sondai-aq Túrkistan oblysynda sý tasqyny qaýpi tóngen 3 aýyldyń halqy evakýatsiialanyp jatyr. Oblys ákimi Ómirzaq Shókeev halyqty sabyrǵa shaqyryp, tótenshe jaǵdaidy retteýge aimaqtyń tolyq múmkindigi bar ekenin aitty
Budan buryn QR Prezidenti Maqtaaral aýdanynda sý tasqynynan zardap shekkenderge kómek kórsetýdi tapsyrǵan edi.
