Aqordanyń baspasóz qyzmeti Qasym-Jomart Toqaev pen Emmanýel Makronnyń birlesken málimdemesin jariialady, - dep habarlaidy "Ult aqparat".
***
1. Qazaqstan Respýblikasynyń Prezidenti Qasym-Jomart Toqaev Frantsýz Respýblikasynyń Prezidenti Emmaniýel Makronnyń shaqyrýymen 2022 jylǵy 29-30 qarashada Frantsiiaǵa resmi sapar jasady.
2. Memleket basshylary 2008 jylǵy 11 maýsymdaǵy Qazaqstan Respýblikasy men Frantsýz Respýblikasy arasyndaǵy Strategiialyq áriptestik týraly sharttyń qoldanysyn atap óte otyryp, eki el arasyndaǵy barlyq deńgeidegi senimdi jáne turaqty dialogqa qanaǵattanýshylyq bildirdi. Qazaqstan ̶ Frantsiianyń Ortalyq Aziiadaǵy basty ekonomikalyq áriptesi, al Frantsiia Qazaqstan ekonomikasynyń jetekshi investorlarynyń biri bolyp tabylady.
3. Qazaqstan men Frantsiia arasyndaǵy diplomatiialyq qarym-qatynastarǵa 30 jyl tolyp otyrǵan kezeńde prezidentter eki el arasyndaǵy saiasi jáne saýda-ekonomikalyq yntymaqtastyqtyń joǵary serpinin quptady.
4. Frantsýz Respýblikasynyń Prezidenti Qazaqstan Respýblikasy Prezidentiniń turaqtylyq pen ornyqty damýdyń ainymas sharty bolyp tabylatyn zań ústemdigin, negizgi bostandyqtardy jáne áleýmettik ádilettilikti nyǵaitýǵa baǵyttalǵan tereń reformalar júrgizýin qoldaitynyn rastady.
5. Taraptar jahandyq jáne óńirlik deńgeide beibitshilikti, qaýipsizdik pen turaqtylyqty nyǵaitýǵa ózara járdemdesý nietin qýattady. Olar halyqaralyq quqyq pen BUU Jarǵysynyń negizgi qaǵidattaryna, ásirese memleketterdiń egemendigi men aýmaqtyq tutastyǵyna ózderiniń myzǵymas beiildigin atap ótti. Qazaqstan men Frantsiia Ýkraina tóńiregindegi jaǵdaiǵa, onyń gýmanitarlyq saldary men jahandyq ekonomikaǵa áserine, eń osal elderdiń azyq-túlik qaýipsizdigine qatty alańdaýda.
6. Prezidentter Qazaqstan Respýblikasy men Eýropalyq Odaq arasyndaǵy Keńeitilgen áriptestik pen yntymaqtastyq týraly kelisim aiasynda tyǵyz ózara is-qimyldy jalǵastyrýǵa daiyn ekendigi jóninde málimdedi. Osyǵan bailanysty olar 2022 jylǵy 27 qazanda Astanada ótken «Eýropalyq Odaq ̶ Ortalyq Aziia» birinshi sammitiniń ótkizilýin quptady.
7. Olar Ortalyq Aziiada iri kóliktik bastamalardyń, atap aitqanda Transkaspii halyqaralyq kólik baǵytynyń damýyn qanaǵattana atap ótti. Taraptar Eýropalyq Odaqtyń «Global Gateway» jobasynyń iske asýyna qoldaý bildirdi.
8. Prezidentter Qazaqstan-Frantsiia yntymaqtastyǵynyń joǵary serpinin basa aitty jáne strategiialyq áriptestik rýhynda ony ártaraptandyrýdy jáne ózara múddeli barlyq, atap aitqanda ekonomika jáne investitsiia, bilim berý, densaýlyq saqtaý, ǵylym jáne mádeniet salalarynda tereńdetýdi jalǵastyrý týraly ýaǵdalastyqqa qol jetkizildi.
9. Ekonomika salasynda prezidentter saýda men investitsiiany, ásirese negizgi energetikalyq sektorda odan ári damytýdyń joǵary áleýetin atap ótti. Qazaqstan Frantsiiaǵa ýran men shiki munaidy negizgi jetkizýshilerdiń biri bolyp tabylady. Taraptar asa baǵaly shikizat materialdary, onyń ishinde jerde sirek kezdesetin materialdar salasyndaǵy ózara yntymaqtastyqty damytý týraly ýaǵdalastyqqa qol jetkizdi. Sapar barysynda jańartylatyn energiia kózderi, «jasyl sýtegin» óndirý, beibit atomdy paidalaný, sý resýrstaryn basqarý, temir jol kóligi jáne agroónerkásip kesheni salalarynda birqatar ekijaqty qujattarǵa qol qoiyldy.
10. Klimattyq kún tártibiniń ózektiligi turǵysynda Qazaqstanda jinaqtaý múmkindigimen bar, respýblikanyń kómirtegisiz innovatsiialyq energiia kózderine kóshýine yqpal etetin qýaty 1,2 GVt jel elektr stantsiiasyn salý boiynsha aýqymdy jobanyń mańyzy atap kórsetildi. Bul joba klimattyń ózgerýine qarsy kúres salasyndaǵy ekijaqty yntymaqtastyǵymyzdyń nyǵaiý nyshany.
11. Prezidentter bilim salasyndaǵy yntymaqtastyqtyń basymdylyǵyn atap ótti. Olar Astana men Almatyda eki frantsýz mektebin ashýǵa jáne damytýǵa qoldaý bildirdi. Stýdentterdiń utqyrlyǵyn, atap aitqanda «Abai-Vern» baǵdarlamasy sheńberinde shákirtaqylar sanynyń kóbeiýine jáne «Bolashaq» baǵdarlamasy boiynsha frantsýz joǵary oqý oryndary tizimin keńeitý arqasynda arttyrýdy qoldady. Sondai-aq Sorbonna-Qazaqstan institýtyn qaita formattaýdy qoldaityndyqtaryn bildirdi jáne 2022 jylǵy 30 qarashada Parijde 7-shi Qazaqstan-Frantsiia joǵary bilim forýmynyń ótýin, sondai-aq bilim berý salasyndaǵy birqatar qujattarǵa qol qoiýdy quptady.
12. Densaýlyq saqtaý salasynda eki eldiń jetekshi zertteý jáne meditsinalyq ortalyqtary arasyndaǵy onkologiia, meditsinalyq mekemelerdi basqarý jáne meditsinalyq qyzmetter kórsetý salasyndaǵy áriptestikti jalǵastyrýdyń mańyzdylyǵyn rastady.
13. Prezidentter mádeniet salasyndaǵy yntymaqtastyqty arttyrý nietin bildirdi. Olar taiaý jyldary eki el arasynda mádeni is-sharalardy, onyń ishinde Parijde Qazaqstan Respýblikasynyń Ulttyq kórmesin ótkizýge baǵyttalǵan bastamalardy quptady.
14. Prezidentter Sharm-el-Sheihte ótken COP 27 Konferentsiiasynda klimattyń ózgerýine qarsy kúreste ózderiniń berik ustanymdaryn qýattady jáne 1,5° deńgeiindegi jahandyq jylý deńgeiin ustaý maqsatyn rastaýdy quptady.
15. Qazaqstan Respýblikasynyń Prezidenti Frantsýz Respýblikasynyń Prezidentine 2024 jyly Parijde ótetin HHHIII jazǵy Olimpiada oiyndaryna daiyndyqta tabys tiledi.
16. Qazaqstan Respýblikasynyń Prezidenti Frantsýz Respýblikasynyń Prezidentin taiaý ýaqytta Qazaqstanǵa saparmen kelýge shaqyrdy.
