Prezident Qasym-Jomart Toqaev bilik partiiasynyń kezekten tys sezine qatysty, dep habarlaidy "Ult aqparat" Aqordanyń resmi saityna silteme jasap.
Memleket basshysy sóz basynda barsha qazaqstandyqtardy Alǵys aitý kúnimen quttyqtady.
– Biz osyndai yntymaqtyń arqasynda qańtardaǵy qiyn-qystaý kúnderde memlekettigimiz ben tutastyǵymyzdy qorǵap qaldyq. Táýelsizdigimizge tóngen qaterdiń betin qaitardyq. Syn saǵatta birligin saqtai bilgen barsha otandastarymyzǵa zor rizashylyq bildiremin. Uiymdy jańǵyrtý týraly alqaly jiynnyń dál búgin ótýiniń simvoldyq máni bar. Birinshi naýryz – partiianyń qurylǵan kúni. 23 jyl buryn elimizdegi eń basty saiasi uiymnyń negizi qalandy. Partiia halyqty ortaq maqsatqa jumyldyrdy. Qoǵamǵa paidaly kóptegen bastamalar kóterip, sailaýshylardyń qoldaýyna ie boldy, – dedi Prezident.
Memleket basshysy partiianyń keleshegi jóninde aita kelip, onyń buǵan deiin atqarǵan jumysyn umytýǵa bolmaitynyna, óz isine berilgen partiia belsendileriniń qajyrly eńbegine qurmetpen qaraý kerek ekenine toqtaldy.
Prezident elimizdiń «Jańa Qazaqstandy» qurý jónindegi aýqymdy mindetti oryndaýǵa kiriskenin málimdedi. Aldymyzda memleketimizdiń bolashaq taǵdyryn sheshetin asa mańyzdy jumys tur. Ony oidaǵydai júzege asyrý úshin jańa maqsat-mindetterimizdi aiqyndap alýymyz qajet. Partiia barlyq reformaǵa uiytqy bolýǵa tiis.
– Saiasi uiymnyń ataýyn Amanat dep ózgertý usynyldy. Jasyratyn eshteńe joq, men de bul máselege bailanysty pikirtalasqa qatystym. Birneshe usynys boldy, sonyń ishinen Amanat degen ataýǵa toqtadyq. Bul – elimiz úshin de, ultymyz úshin de airyqsha máni bar kieli uǵym. Egemendigimiz, eldigimiz ben birligimiz, keń baitaq jerimiz – bizge babalardan jetken amanat. Osy qasterli qundylyqtarymyzdy kózdiń qarashyǵyndai saqtap, bolashaqqa miras etýimiz kerek. Memlekettilik dástúr jalǵastyǵy, urpaq sabaqtastyǵy degenimiz – mine osy. Halqymyz eshqashan amanatqa qiianat jasamaǵan. Partiia bul qaǵidatty berik ustanady. «Amanat» ata-babalarymyzdyń keleshek urpaqqa qaldyrǵan ósieti degen uǵymdy bildiredi. Amanat sóziniń – maǵynasy tereń, halqymyzdyń tarihy men mádenietinde erekshe oryn alady. Ol babalarymyz ósiet etken táýelsizdiktiń máńgi arman-muraty, qýatty memlekettiliktiń jáne jalpyulttyq tutastyqtyń, keń-baitaq Otanymyzdyń qundylyǵy retinde sipattalady. Biz osy baǵa jetpes muramyzdy saqtap, nyǵaitýǵa tiispiz. Bul – bizdiń aǵa býyn men óskeleń urpaq aldyndaǵy qasterli boryshymyz. Sondyqtan men partiiamyzdy resmi túrde Amanat dep ataýdy tolyq qoldaimyn, – dedi Qasym-Jomart Toqaev.
Prezident ótken aida júrgizilgen aýqymdy analitikalyq jumystar partiia qyzmetine mańyzdy ózgerister engizý qajet ekenin kórsetti dep atap ótti. Joǵaryda aitylǵan usynystardy qoldai otyryp, partiia Tóraǵasy biqatar basym mindetti aiqyndap berdi. Onyń pikirinshe, eń aldymen, ortalyqqa táýeldilikti joiý jáne partiia apparatynyń tiimdiligin arttyrý qajet.
– Partiia apparatynyń jumysynda biýrokratiianyń teris sipattary anyq kórindi. Jelilik kesteler, esep berý jáne qaǵaz júzindegi is-sharalar sailaýshylarmen tikelei jumys isteýdi ekinshi orynǵa syrǵytty. Jumysqa qulshynyp turǵan azamattar óz oryndaryn darynsyz fýnktsionerlerge berýge májbúr boldy. Sondyqtan ortalyq apparattyń filialdarmen jáne bastaýysh partiialyq uiymdarmen ózara is-qimyl ádisterin tolyǵymen qaita qaraý qajet. Biýrokratiia men qaǵazbastylyqtan úzildi-kesildi bas tartý kerek. Aimaqtyq filialdar men bastaýysh uiymdary sailaýshylarmen ózdiginen jumys istei alady jáne jumys isteýge mindetti. Ortalyq apparat nusqaýshylyq jáne «qolmen» basqarý tájiribesinen arylýǵa tiis, – dedi Memleket basshysy.
Qasym-Jomart Toqaevtyń aitýynsha, Májilis pen máslihattardaǵy fraktsiialardyń qyzmetin jandandyrý qajet. Depýtattyq fraktsiialar dialog alańdaryn uiymdastyrý mindetin ózderine alyp, olardyń jumys qorytyndysy boiynsha naqty nátijege qol jetkizýi kerek.
– Áleýmettik jeliler men qala alańdaryndaǵy qoǵamdyq talqylaýlardy Parlament pen máslihattarda ótkizgen jón. Bul – asa mańyzdy mindet. Fraktsiialar depýtattyq saýaldarmen shektelip qalmai, parlamenttik jáne qoǵamdyq talqylaýlar men ashyq pikir-saiystarǵa barýǵa tiis. Qajet bolsa, Úkimettiń naqty músheleri men ákimderge senim máselesin kóterý qajet. Barlyq deńgeidegi partiia depýtattarynyń reitingi aldyn ala daiyndalǵan esepterge emes, naqty ister men azamattardyń máselelerin sheshýge negizdelýi kerek, – dedi partiia Tóraǵasy.
Memleket basshysy azamattardyń múddelerin ilgeriletýdi jáne partiianyń ashyqtyǵyn basty másele retinde aiqyndady.
– Partiia popýlizmge salynyp, oryndalmaityn ýáde bermegeni jón. Sonda Premer-ministr men kabinet múshelerinen qajetti sandardy talap etýge de jol berilmeidi. Eger osylai jalǵasa berse, kúdik kúsheiip, adamdardyń partiiaǵa degen senimi joǵalady. Al onyń partiiaǵa keri áseri tiedi. Bundai kózboiaýshylyqtyń saldary adamdardyń áleýmettik kóńil-kúiine jáne ishki saiasi turaqtylyqqa yqpal etedi. Buǵan, ásirese, geosaiasi turaqsyzdyq jaǵdaiynda jol berýge bolmaidy. Sailaýshylarmen keri bailanysty kúsheitken jón jáne osy baǵytta qoǵamdyq qabyldaýlardyń áleýetin barynsha paidalaný qajet, – dedi Prezident.
Partiia Tóraǵasy elimizdi odan ári jańǵyrtý úshin partiialastarynan tyń usynystar kútetinin atap ótti. Sondyqtan jalpyulttyq ózekti máseleler kún tártibin ázirleý úshin Qazaqstannyń árbir azamatynan tyń ideialar men usynystar jinaý jóninde respýblikalyq aktsiia uiymdastyrǵan jón. Memleket basshysy partiialastardyń ishinen senimdi adamdardy iriktep, olardy ilgeriletý isin jalǵastyrǵan jón dep sanaidy.
– Ashyǵyn aitqanda, qazirgi kezde saiasi menedjerlerdi daiarlaý isi aqsap tur. Qazirgi jaǵdaida saiasi basshylar túrli mamandarmen, jastarmen, jýrnalistermen, halyqtyń barlyq ókilderimen til tabysa alýy kerek. Mundai adamdar el arasynda az emes. Áleýmettik liftiniń joqtyǵy – birden-bir kedergi. Jas ári qabiletti mamandarǵa múmkindik bermeimiz. Bul – bizdiń basty kemshiligimiz. Partiia qurylymynda Saiasi menedjment akademiiasy bar. Osy akademiianyń qyzmetin kúsheitý qajet, – dedi Prezident.
Prezident osy aitylǵan mindetterdi meilinshe qysqa merzim ishinde oryndaý qajet ekenine nazar aýdardy. Partiia Tóraǵasy ortalyq apparatqa jumys tobyn quryp, partiianyń jańa tuǵyrnamasyn ázirleýdi tapsyrdy. Onyń aitýynsha, Amanat – ozyq oilaý men ádildiktiń, birlik pen alǵa ilgerileýdiń partiiasy, halyqtyń pikiri men el múddesin eskeretin azamattarymyzdyń igiligi jolynda qyzmet etetin negizgi uiym. Ýkrainada bolyp jatqan qazirgi jaǵdaida osy aitylǵan barlyq máseleniń máni zor.
– Bizdiń ustanymymyz memleketimizdiń qaýipsizdigin, egemendigi men aýmaqtyq tutastyǵyn qamtamasyz etýdi kózdeidi. Biz 2010 jyly Eýropadaǵy qaýipsizdik jáne yntymaqtastyq uiymynyń sammitin ótkizgen el retinde eýraziialyq qaýipsizdiktiń tutastyǵy qaǵidatyna beiildimiz. Men bul týraly 10 aqpanda Máskeýge jasaǵan saparymda aittym. Biz eki memleketti kelissóz ústelinde ortaq til tabysýǵa, ýaǵdalastyq pen kelisimge kelýge shaqyramyz. Basqa jol joq. Jaqsy janjaldan jaman bitim artyq. Beibitshiliksiz damý bolmaidy, – dedi Memleket basshysy.
Qasym-Jomart Toqaevtyń pikirinshe, Qazaqstan, qajet bolsa, deldaldyq qyzmettermen qosa, barlyq kómek túrlerin kórsetýge daiyn.
– Men Qaýipsizdik Keńesiniń birqatar otyrysyn ótkizdim. Sanktsiialyq qarsylyqtyń buryn-sońdy bolmaǵan shielenisýi jaǵdaiynda Úkimetke eldiń turaqty áleýmettik-ekonomikalyq damýyn qamtamasyz etý jóninde naqty mindetter júktedim. Bizdiń ekonomikamyz daǵdarys jaǵdaiynda úzdiksiz jumys isteýdi qamtamasyz etý úshin sanktsiialyq syn-qaterlerge qarsy turýǵa daiyn bolýy kerek. Aldaǵy qiyndyqtar men synaqtardy bárimiz birge eńseremiz dep oilaimyn. Olardyń kúrdeliligin baǵalamaýǵa nemese asyra kórsetýge bolmaidy, – dedi Prezident.
Qasym-Jomart Toqaev eldiń qaýipsizdigi men halyqtyń ál-aýqatyn qamtamasyz etý úshin qoldan kelgenniń bárin jasaýǵa ýáde berdi.
