Memleket basshysy Frantsiia Prezidenti Emmaniýel Makronmen kezdesti, dep habarlaidy "Ult aqparat" Aqordanyń baspasóz qyzmetine silteme jasap.
Parijge resmi saparmen kelgen Memleket basshysy Qasym-Jomart Toqaev Frantsiia Prezidenti Emmaniýel Makronmen keńeitilgen quramda kelissóz júrgizdi.
Kelissózge deiin Elisei saraiynda resmi qarsy alý rásimi ótti.
Kezdesý barysynda Qasym-Jomart Toqaev Frantsiiaǵa resmi saparmen kelýge shaqyrǵany jáne Qazaqstan Prezidenti laýazymyna qaita sailanýyna orai quttyqtaǵany úshin Emmaniýel Makronǵa alǵys aitty.
Memleket basshysy bul sapar eki el arasyndaǵy strategiialyq seriktestikti nyǵaityp, qarym-qatynasty jańa deńgeige kóterýge zor múmkindik beretinin atap ótti.
Frantsiia 2005 jyldan beri Qazaqstan ekonomikasyna jalpy kólemi 17 milliard dollar investitsiia quiyp, eń iri bes investor eldiń qataryna kirdi. Sońǵy 9 aida ekijaqty taýar ainalymy 2,5 milliard dollarǵa jetti. Bul - byltyrǵy osy kezeńmen salystyrǵanda 6,1 paiyzǵa joǵary. Frantsiianyń Ortalyq Aziia elderimen jasaǵan saýda-sattyǵynyń 90 paiyzy Qazaqstanǵa tiesili. Eki memleket energetika, taý-ken óndirisi, jeńil ónerkásip, qurylys, aeroǵarysh, mashina jasaý, densaýlyq saqtaý jáne tamaq ónerkásibi salalarynda tiimdi jobalardy birlesip júzege asyryp keledi. Qazaqstanda 170-ten astam frantsiialyq kompaniia men birlesken kásiporyn jumys isteidi. Olardyń arasynda ekonomikamyzdyń jetekshi investorlary sanalatyn Total Energies, Air Liquide, Airbus, Alstom, Orano jáne Danone sekildi kompaniialar bar. Byltyr elderimiz Saýda-ekonomikalyq jáne investitsiialyq yntymaqtastyqtyń 2030 jylǵa deiingi jol kartasyn bekitti.
Kelissóz barysynda Qasym-Jomart Toqaev elimizde júrgizilip jatqan saiasi jáne ekonomikalyq jańǵyrý úderisi jóninde aitty.
Óz kezeginde Emmaniýel Makron Qazaqstan Frantsiianyń strategiialyq seriktesi ekenin atap ótti. Eki el arasynda saýda-ekonomikalyq yntymaqtastyq qarqyndy damyp keledi. Energetika salasynda birlesken jobalar júzege asyrylyp jatyr. Eýropalyq Odaq Qazaqstandaǵy túrli jobalarǵa investitsiia salyp keledi.
Sonymen qatar Emmaniýel Makron 2024 jyly Qazaqstanda frantsýz tilinde oqytatyn jańa mektepter ashylatynyn aitty. Frantsiia Prezidenti Qazaqstanda júrgizilip jatqan reformalarǵa qoldaý bildirdi.
Taraptar eki eldiń bilim jáne mádeniet salalaryndaǵy bailanystaryn nyǵaitý jóninde pikir almasyp, halyqaralyq kún tártibindegi ózekti máselelerdi jáne Ortalyq Aziia óńirindegi jaǵdaidy talqylady.
Kezdesý sońynda Qasym-Jomart Toqaev Emmaniýel Makrondy Qazaqstanǵa saparmen kelýge shaqyrdy.
