Memleket basshysy Batys Qazaqstan oblysyna jumys sapary aiasynda áýejaidy qaita jóndeý jumystarynyń josparymen tanysty.
1979 jyly iske qosylyp, búginde tozyǵy jetken Oral qalasynyń halyqaralyq áýejaiyna qaita jóndeý jáne keńeitý jumystary biyl shilde aiynda bastalady. Jospar boiynsha 2020 jyldyń sońynda aiaqtalýy tiis qurylystyń nátijesinde, terminal kólemi 4 myńnan 7 myń sharshy metrge deiin keńeiedi. Qazirgi ýaqytta terminaldyń ótkizý qabileti – saǵatyna 200 jolaýshy bolsa, jóndeýden keiin 400-ge deiin jetetin bolady. Qazir jylyna 160 myń jolaýshyǵa qyzmet kórsetilse, bolashaqta áýejai 350 myń jolaýshyny qabyldap-shyǵaryp salýǵa múmkindik alady.
Qazaqstan Prezidenti áýejai terminalyn qaita jóndeý Batys Qazaqstan oblysynda jaily investitsiialyq klimat qalyptastyrýdyń alǵysharty ekenine toqtaldy.
– Oral – Eýropaǵa shyǵatyn basty qaqpamyz. Sheteldik investitsiiaǵa tartymdy bolý úshin mundai jobany sapaly ári ýaqtyly oryndaý kerek, – dedi Qasym-Jomart Toqaev.
Oral halyqaralyq áýejaiyn qaita jóndeý jumystaryna biznestiń áleýmettik jaýapkershiligi aiasynda «Qarashyǵanaq Petroliým Opereiting» kompaniiasy 2,4 milliard teńge bólgen.
