Qazaqstan Prezidenti Qasym-Jomart Toqaev Prezident Mýn Chje Inniń shaqyrýymen Koreia Respýblikasynyń astanasy Seýl qalasyna memlekettik saparmen keldi, dep habarlaidy QazAqparat Memleket basshysynyń baspasóz hatshysy Berik Ýálige silteme jasap.
Qasym-Jomart Toqaev pandemiia bastalǵaly beri Ońtústik Koreiaǵa saparmen kelgen álemdik deńgeidegi birinshi kóshbasshy.
Memlekettik sapar baǵdarlamasy asa aýqymdy. Erteń, 17 tamyz kúni Prezident Mýn Chje Inmen kelissóz ótkizý josparlanǵan. Onda taraptar Qazaqstan men Koreia arasyndaǵy strategiialyq yntymaqtastyqty odan ári damytýdyń keń aýqymdy máselelerin qarastyrady. Kelissóz qorytyndysy boiynsha birqatar ekijaqty qujatqa qol qoiylady.
Qasym-Jomart Toqaev Mýn Chje Inmen birge Koreia biznesiniń jetekshilerimen kezdesý ótkizedi.
Sonymen qatar, Memleket basshysy Koreianyń ulttyq batyry, ómiriniń sońǵy jyldarynda Qazaqstanda turǵan general Hon Bom Dony eske alýǵa arnalǵan is-sharaǵa qatysyp, Otan úshin qurban bolǵandardyń Monýmentine gúl shoǵyn qoiady.
Budan keiin Koreianyń iri kompaniialarynyń qatysýymen birqatar ekijaqty kezdesý ótkizedi. Sondai-aq BUU-nyń burynǵy Bas hatshysy Pan Gi Mýnmen júzdesý josparlanǵan.
