Memleket basshysy Qazaqstan men Reseidiń HVIII Óńiraralyq yntymaqtastyq forýmyna qatysty, dep habarlaidy "Ult aqparat" Aqordanyń resmi saityna silteme jasap.
Sondai-aq, forýmǵa oblystardyń basshylary, salalyq memlekettik organdar men eki el isker toptarynyń ókilderi qatysty.
Prezident beinebailanys rejiminde ótken jiynda barlyq shekteýdi alý jáne saýda salasynda ózara tiimdi jaǵdai jasaý elderimizdiń sapaly ekonomikalyq ósimine jol ashatynyn atap ótti.
– Ótken aida biz elderimiz úshin ataýly data – diplomatiialyq qatynastardyń ornaǵanyna 30 jyl tolǵanyn atap óttik. Osy ýaqyt ishinde eki memleket dostyq pen tatý kórshilik qatynastarǵa negizdelgen ózara tiimdi strategiialyq seriktestik ornata aldy. Elderimiz arasynda senimdi jáne konstrýktivti dialog ornap, yntymaqtastyqtyń joǵary deńgeiine qol jetkizildi. Biz halyqaralyq uiymdar men integratsiialyq birlestikter (BUU, TMD, UQShU, EAEO, ShYU, EQYU jáne AÓSShK) aiasynda ózara belsendi áreket etemiz. Bul óńirlik qaýipsizdikti qamtamasyz etýge jáne búkil Eýraziianyń jahandyq saiasat pen ekonomikadaǵy rólin arttyrýǵa eleýli úles qosady, – dedi Qasym-Jomart Toqaev.
Memleket basshysynyń aitýynsha, eki el arasyndaǵy ekonomikalyq qatynastar jyldan jylǵa kúsheiip keledi. Ózara taýar ainalymy turaqty túrde ósip kele jatyr. Birlesken jobalar iske asyrylyp, ózara esep aiyrysý baǵytynda ulttyq valiýtalardyń úlesi ulǵaia tústi.
– Byltyr Qazaqstan men Resei arasyndaǵy saýda kólemi jańa rekordtyq deńgeige – 24,5 milliard dollarǵa jetti. Biyl alǵashqy 9 aidyń qorytyndysy boiynsha taýar ainalymynyń kórsetkishi 5 paiyzǵa ósti. Reseige shyǵarylatyn qazaqstandyq eksporttyń assortimenti jaqsardy. Onyń quny 100 myń dollardan asady. Ótken jylmen salystyrǵanda taýar ataýlarynyń sany 640-tan 1050-ge deiin kóbeidi. Almatydan Resei óńirlerine taýar jetkizý 2,5 eseden astam, al Astanadan – 5 ese ósti. Shekaralas oblystar arasyndaǵy saýda-sattyq aitarlyqtai jandandy. Mysaly, Reseige Aqtóbe oblysynan taýar jetkizý 48 paiyzǵa, Pavlodar oblysynan 36 paiyzǵa artty, – dedi Prezident.
Qasym-Jomart Toqaev elimizde Reseidiń úlesi bar 17 myńnan astam kompaniia men Qazaqstan-Resei birlesken kásiporny tabysty jumys istep jatqanyn jetkizdi.
– Qazaqstanǵa quiylǵan Resei investitsiiasy jyldan jylǵa artyp keledi. Reseilik investitsiianyń qaýipsizdigin qamtamasyz etip, ekonomikamyzǵa barynsha kóptep tartý úshin qolymyzdan kelgenniń bárin jasaimyz. Bul – elderimiz arasynda tiimdi ózara is-árekettiń jolǵa qoiylǵanyn dáleldeitin taǵy bir derek. Osy oraida byltyr Reseiden Qazaqstanǵa tartylǵan tikelei investitsiia pandemiiaǵa deiingi deńgeiden joǵary boldy. Atap aitqanda, úshten bir eseden astam kórsetkishke jetip, 1,9 milliard dollardan asty. Sondai-aq Qazaqstannyń Reseige salǵan investitsiiasy da 34 paiyzǵa artyp, 535 million dollarǵa jetti. Budan bólek, elderimizdiń saýda-ekonomikalyq yntymaqtastyǵyn odan ári kúsheitýge áleýetimiz jetkilikti. Kooperatsiialyq yntymaqtastyqqa erekshe qyzyǵýshylyq tanytyp otyrmyz. Búginde bul sala boiynsha Qazaqstan men Resei arasynda jalpy quny 23 milliard dollar bolatyn 110 birlesken joba júzege asyrylyp, 30 myńǵa jýyq jumys orny ashyldy, – dedi Qasym-Jomart Toqaev.
Memleket basshysy logistikalyq jelilerdi jańǵyrtýdy jedeldetýge shaqyrdy. Onyń pikirinshe, saýda men ekonomika salalarynda jańa ósim kózderin qarastyrýǵa ýaqtyly qabyldanǵan batyl sheshimder ǵana septigin tigizedi. Osylaisha, Qazaqstannyń shekaralas óńirlerinde ónimdi ótkizýdiń zamanaýi jáne tiimdi infraqurylymyn qalyptastyrý úshin búkil Eýraziia keńistigine arnalǵan saýda habtary júiesi qurylyp jatyr. Sonymen qatar Memleket basshysy kópjaqty ózara tiimdi yntymaqtastyqty odan ári keńeitý úshin birlesken kúsh-jigerdi mynadai salalarǵa jumyldyrýdy usyndy.
– Birinshi. Transshekaralyq jáne óńiraralyq yntymaqtastyq jónindegi shaǵyn komissiianyń qyzmetin kúsheitý qajet. Óńiraralyq yntymaqtastyq baǵdarlamalaryn úilestirý jáne iske asyrý – atalǵan komissiianyń negizgi mindetteriniń biri. Ekinshi. Shekara infraqurylymyn jaqsartýǵa, Qazaqstan men Resei arasyndaǵy shekara pýnktteriniń ótkizý múmkindigin keńeitýge erekshe nazar aýdarý qajet. Bul jumysty salynyp jatqan «Bir beldeý, bir jol» bastamasy men «Soltústik – Ońtústik» transulttyq dálizderin eskere otyryp, júzege asyrý kerek dep esepteimiz. Bul baǵyttardy EEO qyzmetimen ushtastyrý qajet. Úshinshi. Qazaqstan turaqty saýda-investitsiia qatynastaryn damytýǵa múddeli, – dedi Qasym-Jomart Toqaev.
Prezident Qazaqstan men Reseidiń shekaralas aýmaqtarynda avtomobil joldaryn salýdy, logistikalyq habtar men ekonomikalyq aimaqtar qurýdy, sondai-aq joǵary dárejeli qaita jasalatyn ónim óndirý salasyndaǵy yntymaqtastyqty keńeitýdi basym baǵyt retinde atap ótti.
