Foto: parlam.kz
Qasym-Jomart Toqaev memleket jáne qoǵam qairatkeri Ómirbek Baigeldiniń otbasy men jaqyn týystaryna kóńil aitý jedelhatyn joldady, - dep habarlaidy «Ult aqparat» Aqordaǵa silteme jasap.
Prezident asa kórnekti memleket jáne qoǵam qairatkeri, Parlament Senatynyń tuńǵysh tóraǵasy, "Otan" ordeniniń iegeri, akademik Ómirbek Baigeldiulynyń dúnieden ótýine bailanysty onyń otbasy men jaqyn týystaryna kóńil aitty.
"Ómirbek Baigeldiuly egemendiktiń berik irgetasyn qalasqan tuǵyrly tulǵa, Otanymyzdyń damýyna qajyrly eńbek sińirgen ultjandy azamat boldy. Qazaqstan Respýblikasy Parlamentiniń qalyptasýyna zor úles qosty. Ǵibratty ǵumyr iesi óziniń naǵyz parasatty tulǵaǵa tán qadir-qasietimen barsha jurttyń syi-qurmetine bólendi. Sońyna jarqyn iz qaldyrǵan Ómirbek Baigeldiulynyń esimi men beinesi halqymyzdyń jadynda máńgi saqtalady. Marqumnyń imany salamat, jany jánnatta bolsyn", – dep jazylǵan jedelhatta.
