Foto: Aqorda
Memleket basshysy Qasym-Jomart Toqaev Oman Sultandyǵy Premer-ministriniń ekonomikalyq máseleler jónindegi orynbasary Ziiazin ben Haisam Ál Saidty qabyldady, dep habarlaidy Ult.kz.
Kezdesý barysynda Prezident Omandy arab álemindegi senimdi seriktes retinde atap ótip, Qazaqstannyń ekijaqty yntymaqtastyqty jan-jaqty damytýǵa múddeli ekenin jetkizdi.
– Ekijaqty saiasi-ekonomikalyq bailanystarymyz nyǵaiyp keledi. Qazaqstan men Oman arasyndaǵy yntymaqtastyqty arttyrýǵa qosqan úlesińizdi erekshe atap ótkim keledi. Osy oraida Sultan Haisam ben Tariq Ál Saidqa sálemimdi joldaimyn jáne ony Astanaǵa saparmen kelýge shaqyramyn, – dedi Qasym-Jomart Toqaev.
Óz kezeginde Ziiazin ben Haisam Ál Said jyly qabyldaý úshin alǵys aityp, Oman tarapy Qazaqstanmen áriptestikti odan ári damytýǵa nietti ekenin rastady. Ol eki el arasyndaǵy diplomatiialyq bailanystar 1992 jyldan beri qalyptasyp, búginde mádeniet, saýda, ekonomika jáne týrizm salalaryn qamtitynyn atap ótti.
Kezdesý barysynda taraptar saýda-ekonomikalyq yntymaqtastyqty keńeitý máselelerin talqylady. Ásirese, energetika, metallýrgiia, kólik-logistika, aýyl sharýashylyǵy, tsifrlandyrý baǵyttaryndaǵy jobalarǵa jáne mádeni-gýmanitarlyq bailanystardy jandandyrýǵa nazar aýdaryldy.
Sonymen qatar Prezident Taiaý Shyǵystaǵy kúrdeli jaǵdaiǵa bailanysty Oman halqyna qoldaý bildirip, eldiń óńirdegi beibitshilik pen turaqtylyqty saqtaýdaǵy rólin joǵary baǵalady.
Kezdesý qorytyndysy boiynsha Qasym-Jomart Toqaev Ziiazin ben Haisam Ál Saidty Qazaqstan men Oman arasyndaǵy dostyq pen yntymaqtastyqty nyǵaitýǵa qosqan úlesi úshin I dárejeli «Dostyq» ordenimen marapattady.
