Memleket basshysy Nur-Sultan jáne Almaty qalalarynyń ákimderimen beinebailanys arqyly keńes ótkizdi, dep habarlaidy "Ult aqparat" Aqordaǵa silteme jasap.
Altai Kólginov Qasym-Jomart Toqaevqa elordadaǵy qazirgi ahýal jáne koronavirýstyń taralýyna qarsy karantin engizilýine bailanysty qabyldanǵan sharalar jaiynda esep berdi.
Prezident qala turǵyndaryn eń qajetti taýarlarmen jáne azyq-túlikpen tolyq qamtamasyz etýdiń mańyzdylyǵyn atap ótti.
Memleket basshysy Nur-Sultan qalasynda ornalasqan shet memleketterdiń diplomatiialyq ókildikteri men halyqaralyq uiymdarǵa qatysty týyndaǵan máselelerdi tez arada sheship, tiisti kómek kórsetý kerektigin aitty.
Qasym-Jomart Toqaev koronavirýske qarsy kúrestiń mańyzdylyǵyn aita kele, qala tirshiligindegi basqa da ózekti máselelerdi kún tártibinen túsirmeýdi, atap aitqanda, sý tasqynyn erekshe baqylaýda ustaýdy tapsyrdy.
Sonymen qatar Baqytjan Saǵyntaev Qasym-Jomart Toqaevqa Almaty qalasynyń karantin engizý jaǵdaiyna ázirligi, qosymsha daiyndalǵan tósek-oryndar sany, koronavirýs indetiniń taralýyna qarsy kúreske qajetti barlyq resýrstar men quraldardy jumyldyrý týraly baiandady.
Memleket basshysy elimizdiń iri megapolisin azyq-túlikpen qamtamasyz etýge bailanysty máselelerdiń sheshilýine erekshe kóńil bólýdi, sondai-aq, áleýmettik mańyzy bar taýarlardyń baǵasyn qatań baqylaýda ustaýda tapsyrdy.
Qasym-Jomart Toqaev Baqytjan Saǵyntaevqa Almaty oblysynyń ákimimen birlesip Almaty qalasynda jumys isteitin óńir turǵyndarynyń megapoliske qatynaý máselelerin pysyqtaý qajettigin aitty.
