Memleket basshysy Qasym-Jomart Toqaev sózdiń emes istiń adamy. Mundai pikirdi «Habar 24» telearnasynyń «Suqbat» baǵdarlamasynda QR Prezidentiniń baspasóz hatshysy Berik Ýáli aitty, dep habarlaidy "Ult aqparat".
«Otandyq BAQ-qa suqbat bermeidi degenmen kelispeimin. Óitkeni, ózderińiz bilesizder, Ana tili, Egemen Qazaqstan gazetterine, merzimdi basylymdarǵa suqbat berip júr. Suqbatqa kelgende kóp adamdar durys túsinbei jatady. Jalpy, Prezident kóp suqbat berip, sóilep, pikir almasqannan góri istiń adamy. Kóp jaǵdaida sózden góri iske den qoiyp, tapsyrmalar berip, onyń oryndalýyn qadaǵalap otyrady. Al telearnaǵa keler bolsaq, jalpy ol oida bar. Aldaǵy ýaqytta suqbat beredi», - dedi Berik Ýáli.
Osy oraida Ýáli kórshi Qytai eliniń tóraǵasyn mysalǵa keltirdi.
"Shyǵystaǵy kórshimiz Qytaidyń tóraǵasy Si Tszinpin myrza byltyr koronavirýs órship, oshaǵy Qytaida paida bolǵan kezde, bir jyldyń ishinde halyqtyń aldyna eki-aq ret shyqqan shyǵar. Ol bir ret halyq aldyna shyǵyp, indetpen qalai kúresip jatqanyn, Qytaidyń ustanymyn aitty, boldy. Qaita-qaita jyltyńdap, suqbat berip, jýrnalister aldyna shyqqanyn kórgen joqpyz. Áli de olai emes", – dedi ol.
Aitýynsha, halyq Prezidentti kóbinese Resei, Eýropa elderiniń memleket basshylarymen salystyrady. Dese de Ýáli Qazaqstan óz aldyna táýelsiz el ekenin, óz joly bolýy kerek ekenin atap ótti.
"Baspasóz hatshysy retinde óz oiym – Memleket basshysy suhbat bergennen góri oblys ákimderinen, salalyq ministrler men agenttik basshylarynan jumysty kóbirek talap etýi kerek dep oilaimyn. Al endi ár nársege prezidentti aralastyra bersek, prezidenttiń basqa da jumystary bar. Sheneýnikterdiń atqaryp jatqan jumysyn qadaǵalasa, halyqqa sol tiimdi bolady dep oilaimyn", – dedi Ýáli.
Aitýynsha, Toqaev aldaǵy ýaqytta telearnaǵa suhbat berýdi josparlap otyr.
Sondai-aq Prezidenttiń baspasóz hatshysy Qasym-Jomart Toqaev áleýmettik jelilerde ózi otyra ma degen suraqqa da jaýap berdi.
"Árine, ózi baqylaidy, ózi júrgizedi. Bizde eldiń arasynda kez kelgen memlekettik laýazymdy tulǵanyń áleýmettik jelisin kómekshileri, bolmasa baspasóz qyzmeti júrgizedi degen qasań pikir bar. Joq, memleket basshysy kez kelgen tvitti ózi qadaǵalap, ózi jazyp, halyqqa ózi usynyp otyr desek, esh qatelespeimiz", – dedi baspasóz hatshysy.
