Memleket basshysy Qasym-Jomart Toqaev «Nur Otan» partiiasynyń kezekten tys sezinde Elbasy Nursultan Nazarbaev týraly pikir bildirdi, - dep habarlaidy "Ult aqparat".
"Qazir el ishinde túrli jaǵymsyz áńgimeler tarap jatqanyn bilemin. Osyǵan bailanysty Memleket basshysy retinde taǵy da qaitalap aitamyn. Tuńǵysh Prezidentimiz elimizdi irgesi berik memleketke ainaldyrý úshin zor eńbek sińirdi.
Biz buǵan deiingi jetistikterimizden aiyrylyp qalmaýymyz kerek. Memleketimizdi nyǵaityp, kez-kelgen synaqqa daiyn bolýymyz qajet. Tabysqa jetý úshin, eń aldymen, aýyzbirshilik kerek ekenin este ustaiyq", - dedi Toqaev.
Prezident 90-jyldardyń basynda belgili saiasatkerler men saiasattanýshylar demografiialyq ereksheligi men Qazaqstan shekarasynyń rettelmeýine bailanysty bizdiń elimiz tez arada ydyraidy dep boljaǵan kezde Nursultan Nazarbaev eń aýyr tarihi kezeńde memlekettik qurylystyń eń kúrdeli missiiasyn óz moinyna alǵanyn aity.
«90-shy jyldardyń ortasynda elimizdiń shekarasyn zańdy túrde rásimdeý jumysy bastaldy jáne ol delimitatsiialaý men demarkatsiialaý jumysymen aiaqtaldy. Bul jetistik memleketimizdiń qaýipsiz qyzmet etýi úshin strategiialyq mańyzǵa ie boldy.
Qazaqstannyń qaýipsizdigin qamtamasyz etýde, onyń geosaiasi pozitsiiasyn nyǵaitýda elordany Saryarqanyń ortalyǵyna kóshirý úlken ról oinady. Bul sheshimdi shetelde de, elimizdiń ishinde de strategiialyq kóregendilik dep moiyndaidy», - dedi Qasym-Jomart Toqaev.
Sondai-aq, ol qazaqstandyqtardy obektivti ári shynshyl bolýǵa, Tuńǵysh prezidenttiń tarihi eńbegin umytpaýǵa shaqyrdy.
"Óz ótkenin qaralaityn halyqtyń bolashaǵy joq. Ótken zamandy joqqa shyǵaratyn, óz basshylaryna shabýyl jasaityn halyqtyń bolashaǵy ekitalai ári bulyńǵyr. Amerika prezidentterinde de, Qytai basshylarynda da, tipti búginde bári madaqtaityn Singapýr lideri Li Kýan Iýde de kemshilik bolǵan", dedi Prezident.
Memleket basshysy Singapýrdyń da, AQSh-tyń da, Qytaidyń da halyqtary men bileýshi toptary óz basshylarynyń qadir-qasietin kemshilikterden joǵary qoiyp, qos uǵymdy ajyrata bilgenin aitty. Óitkeni, jumys istemeitin adamnyń ǵana qatelespeitini burynnan belgili.
«Tuńǵysh Prezidenttiń tarihi eńbegine qurmet kórseteiik, onyń sózsiz jetistikteri men qadir-qasietterin birinshi orynǵa qoiaiyq, al bolýy múmkin jańylystardy elimizdiń bolashaq basshylaryna ǵibrat etip qaldyraiyq», - dedi Toqaev.
