Memleket basshysy Tsifrlyq damý, innovatsiialar jáne aeroǵarysh ónerkásibi ministri Baǵdat Mýsinniń esebin tyńdady, dep habarlaidy "Ult aqparat" QR Prezidentiniń baspasóz hatshysy Berik Ýálige silteme jasap.
Qasym-Jomart Toqaevqa ministrliktiń biylǵy birinshi jartyjyldyqtaǵy atqarǵan jumystary, memlekettik qyzmet kórsetý isin damytýdyń ózekti máseleleri, sondai-aq, Prezidenttiń Qazaqstan Respýblikasy Úkimetiniń keńeitilgen otyrysynda bergen tapsyrmalarynyń oryndalýy týraly baiandaldy.
Memleket basshysyna internet sapasyn arttyrý úshin qabyldanyp jatqan sharalar týraly málimet berildi. Baǵdat Mýsinniń aitýynsha, ministrlik internet sapasyn tekserýdi jiiletken. Sonyń nátijesinde sapasyz qyzmet kórsetkeni úshin bailanys operatorlaryna aiyppul salynǵan.
Sonymen qatar vedomstvo basshysy Prezidentke biylǵy alty ai ishinde Qazaqstandaǵy internet trafigi 7900 petabaitqa deiin artqanyn jetkizdi. Bul byltyrǵy bir jyl ishindegi kórsetkishpen salystyrǵanda 15 paiyzǵa artyq.
Ministr internet sapasyna qatysty negizgi kórsetkishter boiynsha ósimniń oń qarqyny bar ekenine nazar aýdardy. Qazaqstan bir jyl ishinde mobildi internettiń jyldamdyǵy boiynsha Speedtest Global Index reitingindegi alatyn ornyn 15 satyǵa jaqsartyp, 80-shi oryndy ielengen. Qazaqstan bekitilgen internet jyldamdyǵy jónindegi reitingte 65-shi orynda tur.
Sonymen qatar Memleket basshysyna shalǵai aýyldarda jyldamdyǵy joǵary keń jolaqty internetke qol jetimdilikti qamtamasyz etý úshin jer ústi orbitalyq spýtniktik bailanystyń jetekshi operatorlarymen birlese júrgizilip jatqan jumystar jóninde baiandaldy.
Budan bólek Baǵdat Mýsin koronavirýs indetine qarsy kúreste jańa tsifrlyq tehnologiialardyń qoldanylýy jáne memlekettik qyzmet kórsetý úderisin ońtailandyrý jóninde esep berdi.
Áńgimelesý sońynda Memleket basshysy birqatar naqty tapsyrma berdi.
