Qazaqstan Prezidenti Arys qalasyndaǵy áskeri poligonǵa bardy, dep habarlaidy "Ult aqparat" Aqordaǵa silteme jasap.
Qasym-Jomart Toqaev byltyr jarylys bolǵan Arys qalasyndaǵy №44859 áskeri bólimine baryp, onyń búgingi jaǵdaiymen tanysty. Qorǵanys ministri Nurlan Ermekbaev ótken jylǵy jarylystan keiin qoimadaǵy oq-dárilerdi kádege jaratý jáne olardy tasymaldaý jumystary jaiynda baiandady. Sonymen qatar áskeri bólimniń tehnikalyq aimaǵyndaǵy oq-dárilerdiń qaldyǵyn tazalaý, jarylǵysh zattardy zalalsyzdandyrý, buzylǵan ǵimarattardy qaita qalpyna keltirý týraly aitty. Budan bólek Qazaqstan Prezidentine áskeri qural-jabdyqtar men arnaiy tehnikalar tanystyryldy.
Memleket basshysy bul poligonnyń, atalǵan áskeri bólimniń ulttyq qaýipsizdikti qamtamasyz etýde mańyzdy ról atqaratynyn atap ótti.
– Qorǵanys ministri jańa maǵan oq-dárilerdiń qaýipsiz qoimalarda saqtalyp jatqanyn jáne adamdarǵa qaýip týdyrmaitynyn baiandady. Degenmen biz endigi jerde mundai jarylystyń bolýyna eshqashan jol bermeýimiz kerek. Bul másele óte mańyzdy jáne meniń tikelei baqylaýymda bolady, – dedi Prezident.
Qasym-Jomart Toqaev oq-dárilerdiń qaýipsiz saqtalýyn qamtamasyz etý maqsatynda Úkimetke qazirgi zamanǵa sai qoimalar salý úshin qajetti sharalar qabyldaýdy tapsyrdy. Olardyń eldi mekenderden alys jerlerde salynýyn, jaramsyz oq-dárilerdi ýaqtyly joiý qajettigin de eskertti.
– Áskeri-kólik aviatsiiasyn, radiatsiialyq, himiialyq jáne biologiialyq qorǵanys kúshteri men quraldaryn, injenerlik áskerlerdi, áskeri meditsinany damytý Qorǵanys ministrligi jumysynyń basym baǵyttarynyń biri bolýy tiis, – dedi Qasym-Jomart Toqaev.
Byltyrǵy jarylystan keiin Arys qalasy tolyqtai qaita jańardy. Áskeri qyzmetshiler 450 myńnan astam oq-dári men jarylǵysh zat zalalsyzdandyrdy. Qoimadaǵy oq-dárilerdi kóshirýge daiyndyqtyń negizgi jumystary aiaqtaldy.
