Prezident sailaýynda jeńiske jetken Qasym-Jomart Toqaev sherýge shyqqandarmen dialog ornatýǵa daiyn. Bul týraly memleket basshysy otandyq jáne sheteldik BAQ ókilderimen kezdesý kezinde aitty, dep habarlaidy Sputnik Qazaqstan tilshisi.
"Iá, shynymen, Almaty men elordada bir top azamat narazylyǵyn bildirý úshin kóshege shyqty. Qazaqstan Respýblikasynyń zańnamasy turǵysynan qarasaq, bas prokýratýranyń eskertýine qaramastan, atalǵan áreketter zańsyz dep saralanýy múmkin. Elimizde bostandyq bar ma degenge toqtalsam, Qazaqstanda bostandyq bar", - dedi Toqaev.
Onyń aitýynsha, narazylyq sherýleri kezinde keibir azamattar politsiia qyzmetkerlerin ádeii arandatqannan keiin, olardyń tarapynan qajetti sharalar qabyldanǵan.
"Bul azamattar shetten keletin aqparatty tutynyp, zańsyz áreketterge barǵan, basqa azamattardyń ómirine qaýip tóndirdi. Azamattar politsiia organdaryna júginip, olardyń tynyshtyǵyn qamtamasyz etýdi suraǵan. Sondyqtan men múmkindikti paidalanyp, óz qyzmetin kásibi jáne abyroimen atqarǵan politsiia qyzmetkerlerine alǵys aitqym keledi", - dedi Memleket basshysy.
Toqaev sailaý qarsańynda quqyq qorǵaý organdaryna ózderin baisaldy ustaýǵa tapsyrma bergenin aitty.
"Olar narazylyq sherýi kezinde solai jasady. Bolashaqta da ózderin dál osylai ustaityn bolady", - dedi Prezident.
Memleket basshysy bas kótergendermen dialogqa daiyn ekenin jetkizdi.
"Men narazylyq sherýine shyqqandarǵa dialog formasyn usyný qajet dep sanaimyn. Buǵan deiin qoǵamdyq senim komiteti qurylatynyn aitqan edim, onyń quramyna bizdiń qoǵamnyń túrli toptarynyń ókilderi kiredi, onda pikir almasatyn bolamyz. Meniń pozitsiiam týraly qoǵamda ártúrli pikir bolýy múmkin, biraq biz - birtutas ultpyz. San pikir – birtutas ult", - dedi ol.
Sondai-aq, jiynda jýrnalister oǵan keshki ýaqytta áleýmettik jelilerdiń buǵattalatynyn aityp shaǵymdandy.
"Jelilerdi buǵattaýǵa kelsek, men ózim áleýmettik jelilerdiń belsendi qoldanýshysymyn. Tvitterdegi paraqshamdy jeke ózim júrgizemin. Sondyqtan, ashyǵyn aitsam, áleýmettik jelilerdiń buǵattalatynyn habarsyz boldym. Biraq, quqyq qorǵaý organdaryna tiisti tapsyrmalar beriledi", - dedi Toqaev.
Dese de, Memleket basshysy áldeýmetik jeliler destrýktivti maqsatta qoldanylmaýy kerektigin eske saldy.
