Qasym-Jomart Toqaev Memlekettik kúzet qyzmetiniń 30 jyldyǵyna arnalǵan is-sharaǵa qatysty, - dep habarlaidy "Ult aqparat" Aqordanyń resmi saityna ilteme jasap.
Prezident Memlekettik kúzet qyzmetiniń jumysymen tanysty. Budan keiin MKQ-nyń 30 jyldyǵyna arnalǵan saltanatty is-sharaǵa qatysyp, sala qyzmetkerlerin quttyqtady.
Memleket basshysy bul qurylymnyń ulttyq qaýipsizdikti qamtamasyz etý júiesinde asa mańyzdy ról atqaratynyn, kúzet qyzmetkerlerine airyqsha jaýapkershilik júktelgenin atap ótti.
"El basshylyǵynyń qaýipsizdigin qamtamasyz etý, strategiialyq nysandardy, sondai-aq shetelden kelgen mártebeli meimandardy qorǵaý ońai jumys emes. Sizder osy mindetti abyroimen atqaryp kelesizder. Bul 30 jyl ishinde qalyptasqan igi dástúr, sabaqtastyq ekeni sózsiz. Búginde Kúzet qyzmetiniń áleýeti orasan zor. Jaýyngerlik tehnikalyq jáne jedel áreket etý múmkindikteri mol. Shyn máninde, Memlekettik kúzet qyzmetin naǵyz patriottardyń ujymy deýge bolady. Eń jaýapty sátte Otan úshin aianbai, adal qyzmet etip kelesizder", - dedi Qasym-Jomart Toqaev.
Qasym-Jomart Toqaev qazirgi shielenisti geosaiasi jaǵdaida Memlekettik kúzet qyzmetiniń túrli syn-qaterler men qaýipterge der kezinde tótep berý múmkindiginiń asa mańyzdy ekenine toqtaldy.
"Jeke quramnyń bilimi men biliktiligin odan ári damytyp, memlekettik kúzettiń búkil júiesin jetildirý qajet. Memlekettik kúzet qyzmeti - erekshe qurylym. Sondyqtan oǵan qoiylatyn talap ta árqashan joǵary bolmaq. Sizder júktelgen mindetti shuǵyl ári tiimdi atqarady dep senemin. Minsiz qyzmetterińiz úshin barshańyzǵa shynaiy rizashylyǵymdy bildiremin", - dedi Qazaqstan Prezidenti.
Memleket basshysy sala qyzmetkerleriniń eńbegine tabys tilep, birqataryn memlekettik nagradalarmen marapattady. Atap aitqanda I jáne II dárejeli "Aibyn" ordenderi, "Jaýyngerlik erligi úshin" medaldary tabystalyp, Prezidenttiń Alǵysy jariialandy.
Qasym-Jomart Toqaev marapattaý rásiminen keiin merekelik kontsertti tamashalady.
