Qasym-Jomart Toqaev Memlekettik kúzet qyzmetiniń basqarýshy quramymen kezdesti, dep habarlaidy "Ult aqparat" Aqordaǵa silteme jasap.
Qazaqstan Prezidenti jeke quramǵa Memlekettik kúzet qyzmetiniń jańadan taǵaiyndalǵan bastyǵy Ánýar Sadyqulovty tanystyrdy.
Qasym-Jomart Toqaev Qazaqstannyń memlekettik kúzet júiesin damytýdyń negizgi baǵyttary týraly Kúzet qyzmeti basshysynyń baiandamasyn tyńdady.
– Memlekettik kúzet qyzmeti – tótenshe mańyzdy uiym. Sizder qyzmet atqarý barysynda osyny qaperde ustańyzdar. Memlekettik kúzet qyzmetine airyqsha mindetter júkteledi. Sondyqtan, memlekettik kúzet máselesi árqashan basty nazarda bolady. Tapsyrylǵan iske barynsha adaldyq tanytyp, joǵary kásibi daiyndyqtaryńyzdy kórsetetinderińizge senimdimin, – dedi Memleket basshysy.
Qazaqstan Prezidenti ishki jáne syrtqy qaýip-qaterdiń qubylmaly jaǵdaiynda kúzet qyzmetkerleriniń kásibiligine qoiylatyn talap óte joǵary bolatynyn atap ótip, qyzmetke kásibi, ideologiialyq jáne ziiatkerlik turǵydan daiyn jas jigitter iriktep alynatynyn aitty.
– Memlekettik kúzet qyzmetiniń ofitserlerinde kelissózder júrgizýge qajetti diplomatiialyq daǵdylarǵa sáikes keletin áskeri biliktilik, qyraǵylyq, aqparatty qoryta bilý siiaqty sapalyq qasietter bolýy tiis. Sonymen qatar, ishki jáne syrtqy saiasatty túsinetin jáne biletin saiasi bilimi jetik bolýy qajet, – dedi Memleket basshysy.
Qasym-Jomart Toqaev shuǵyl áreket etý shtabynyń jumysymen tanysyp, Memlekettik kúzet qyzmetiniń jumys kabinetterin aralap kórdi. Sondai-aq, Kúzet qyzmetiniń jumysyn odan ári jetildirý jóninde birqatar tapsyrma berdi.
