Memleket 100 myń azamattyń nesiesin ótep beredi. Bul týraly búgin Aqordada BAQ ókilderine QR Prezidentiniń syilyqtary men granttaryn tabystaý rásiminde Memleket basshysy Qasym-Jomart Toqaev aitty, dep habarlaidy QazAqparat tilshisi.
«Áleýmettik turǵyda barynsha az qamtylǵan azamattar túrli qiyn jaǵdailarǵa bailanysty ózine alǵan kredittik mindettemesin oryndai almai otyrǵan ahýal qalyptasty. Kóptegen azamattardyń qaryz júktemesi artyp keledi, olardyń shynaiy tabystary tómendeýde. Adamdar kreditteri boiynsha qaryzdaryn qalai óterin bilmei otyr jáne bul problema shamamen 100 myń azamatymyzdyń ómirlik múddesine qatysty», - dedi Memleket basshysy.
QR Prezidentiniń dereginshe, kreditterdiń 86 paiyzdan astamynyń kólemi 1 mln teńgege jetpeidi. Al ortasha bereshek kólemi shamamen 300 myń teńgeni qurap otyr.
«Munyń barlyǵy saraptalǵan jáne eseptelingen. Qazaqstannyń basshysy retinde adamdardyń belsheden batqan qaryzdan shyǵýǵa qaýqarsyz ekendigin kóre otyryp, buǵan aralaspai tura almaimyn. Sondyqtan Úkimetke bir rettik aktsiia retinde kelesi sharalardy qabyldaýdy tapsyrdym: joǵaryda atap ótken sanattaǵy árbir zaemshi úshin naqty jáne ataýly qarjylai kómek retinde memleket ekinshi deńgeili bankter men shaǵyn qarjy uiymdarynan alynǵan jalpy mólsheri 300 myń teńgege deiin negizgi nesieni jáne oǵan eseptelgen syiaqyny óteidi», - dedi Q.Toqaev.
Budan bólek, Memleket basshysynyń atap ótýinshe, olardyń biylǵy 1 maýsymǵa deiingi qaryzdarynyń jalpy kólemi 3 mln. teńgeden aspaýy tiis.
«Nesie alǵandardyń 55 paiyzy, iaǵni 250 myń adam úshin bul negizgi nesie men syiaqyny qosa alǵanda jalpy qaryz kólemin tutastai tóleý degendi bildiredi. Qalǵan nesie alǵan azamattardyń qaryzdary 300 myń teńge mólsherinde óteledi. Bul olardyń tóleý qabilettiligin qalpyna keltirýge jáne qaryz júktemesin tómendetýge aitarlyqtai septigin tigizedi. 2019 jyldyń 1 shildesindegi málimet boiynsha bankterde jáne shaǵyn qarjy uiymdarynda kepilsiz tutyný qaryzdary bar barlyq azamattar úshin eseptelgen aiyppuldar men tólemaqy ósimderi esepten shyǵarylady. Nesie alýshylardyń atalǵan tólemderin esepten shyǵarý, eń aldymen, ekinshi deńgeidegi bankter men shaǵyn qarjy uiymdarynyń esebinen júrgiziledi. Sonymen qatar, nesie berýge, nesiege qatysty qyzmet kórsetýge jáne jeke tulǵalardyń 90 kúnnen astam merzimi ótken barlyq kepilsiz qaryzdaryna bailanysty aiypaqy, komissiia jáne ózge de tólemder esepteýge tyiym salynady», - dedi Memleket basshysy.
