Qazaqstan Prezidenti Qasym-Jomart Toqaev Reseidiń Federaldyq jinalysy Federatsiia keńesiniń tóraǵasy Valentina Matvienkony qabyldady, dep habarlaidy Aqorda.
Memleket basshysy Qasym-Jomart Toqaev Qazaqstanǵa resmi saparmen kelgen Reseidiń Federaldyq jinalysy Federatsiia keńesiniń tóraǵasy Valentina Matvienkomen kezdesý ótkizdi.
Kezdesý barysynda Qazaqstan men Resei arasyndaǵy kópjaqty strategiialyq seriktestik pen odaqtastyqty nyǵaitýdyń, perspektivalary talqylandy. Sonymen qatar saýda-ekonomikalyq, mádeni-gýmanitarlyq yntymaqtastyqqa, eýraziialyq integratsiiaǵa jáne eki eldiń koronavirýs pandemiiasyna qarsy kúrestegi birlesken kúsh-jigerine qatysty ózekti máseleler sóz boldy.
Memleket basshysy Federatsiia keńesiniń delegatsiiasyna iltipat bildirip, Valentina Matvienkonyń elderimiz arasyndaǵy ekijaqty qatynastardy damytýǵa jáne nyǵaitýǵa qosqan úlesin joǵary baǵalady. Sondai-aq TMD Parlamentaralyq assambleiasy keńesiniń tóraǵasy qyzmetindegi jemisti eńbegine toqtaldy.
Prezident zań shyǵarýshy organdardyń Qazaqstan men Resei arasyndaǵy bailanystaryn jaqyndatýdaǵy rólin erekshe atap ótti.
«Parlamenttik diplomatiia memleketaralyq yntymaqtastyqty damytýda úlken ról atqarady dep sanaimyn. Bul ásirese, Qazaqstan men Resei Federatsiiasy arasyndaǵy yqpaldastyqqa qatysty. Biz úshin dostyq, odaqtastyq bailanystar negizgi basymdyqqa ie», – dedi Qasym-Jomart Toqaev.
Sonymen qatar Prezident Federatsiia keńesiniń tóraǵasyna elimizde iske asyrylyp jatqan saiasi jáne ekonomikalyq reformalar jóninde aitty.
Áńgimelesý barysynda Qasym-Jomart Toqaev Reseidiń halyqaralyq arenadaǵy ornyn nyǵaitý isindegi Vladimir Pýtinniń saiasi baǵytynyń mańyzdy rólin atap ótti.
«Vladimir Pýtinniń myqty ári bedeldi basshylyǵymen Resei Federatsiiasy halyqaralyq arenada ózin álem elderi sanasatyn jáne onsyz birde-bir mańyzdy halyqaralyq problema sheshilmeitin memleket retinde tanytty», – dedi Qasym-Jomart Toqaev.
Valentina Matvienko Prezidentke kezdesýge múmkindik jasaǵany úshin shynaiy rizashylyǵyn bildirdi.
«Sapar aldynda Vladimir Pýtinmen sóilestim. Ol Sizge júrekjardy sálemin joldady. Sondai-aq Sizderdiń senimdi ári shynaiy qarym-qatynastaryńyzdy joǵary baǵalaitynyn aitty. Qol jetkizilgen barlyq ýaǵdalastyqtardyń júzege asyrylatynyn naqtylady», – dedi Federatsiia keńesiniń tóraǵasy.
Budan bólek Valentina Matvienko elordamyzdan alǵan áserimen bólisti.
«Kezinde Vladimir Pýtin Nur-Sultan qalasyn qazirgi zamannyń ǵajaiyby degen edi. Shyn máninde, qala kóz aldymyzda kórkeiip keledi. 6 shildede qala kúnin atap ótetinderińizdi bilemin. Sizdi jáne Nur-Sultan qalasynyń barsha turǵynyn kele jatqan merekelerińizben quttyqtaimyn», – dedi Valentina Matvienko.
Sonymen qatar Valentina Matvienko Qasym-Jomart Toqaevqa Parlament Senatynda jáne Májiliste ótken kelissózderdiń qorytyndylary týraly aitty.
Kezdesý sońynda Qasym-Jomart Toqaev reseilik áriptesi Vladimir Pýtinge shynaiy iltipatyn bildirip, ystyq sálemin joldady.
