Memleket basshysy Qasym-Jomart Toqaev ERG kompaniialar tobynyń aktsionerleri Aleksandr Mashkevich pen Patoh Shodievti qabyldady, dep habarlaidy "Ult aqparat" Aqordaǵa silteme jasap.
Qasym-Jomart Toqaevqa taý-ken metallýrgiialyq korporatsiiasynyń 2020 jylǵy qarjylyq jáne óndiristik qyzmetiniń nátijeleri men biylǵy birinshi toqsandaǵy jumysy jaiynda baiandaldy.
Aleksandr Mashkevich pen Patoh Shodiev Eýraziialyq top kásiporyndarynyń júzege asyryp jatqan investitsiialyq jáne áleýmettik jobalary jaiynda aitty. ERG kompaniialar toby Qazaqstanda jumys istegen 25 jyl ishinde óndiriske 13 milliard dollardan astam investitsiia salǵan, al, áleýmettik baǵytqa 1 milliard dollardan asa qarjy jumsaǵan. Byltyrǵy jyldyń qortyndysy boiynsha kásiporyn 221 milliard teńge salyq tólegen.
Aleksandr Mashkevich pen Patoh Shodiev Qasym-Jomart Toqaevqa óndiris nysandarynda COVID-19 indetiniń taralýyna jol bermeýge qatysty qabyldanyp jatqan sharalar, sondai-aq, korporatsiianyń pandemiiamen kúreske qosqan úlesi jaiynda málimet berdi. ERG kompaniialar toby indetpen kúreske 5,6 milliard teńgeden astam qarjy bóldi. Atalǵan qarjy kompaniia jumys istep jatqan óńirlerge dári-dármek satyp alýǵa, aýrýhanalardy qajetti quraldarmen jabdyqtaýǵa jumsaldy. Búginde kásiporyn qyzmetkerleri erikti túrde koronavirýsqa qarsy ekpe saldyryp jatyr.
Kezdesý barysynda jańa investitsiialyq jobalardyń júzege asyrylýy talqylandy. ERG kompaniiasy jýyq arada jalpy somasy 5,9 milliard AQSh dollary kóleminde investitsiia salýdy josparlap otyr.
Memleket basshysy jobalarda qazaqstandyq mazmunnyń kólemin jáne biznestiń áleýmettik jaýapkershiligin arttyrýǵa erekshe kóńil bóle otyryp, belgilengen josparlardy óte qysqa merzimde jáne barynsha tiimdi oryndaýǵa shaqyrdy.
