Prezident Qasym-Jomart Toqaevqa Premer-Ministr Asqar Mamin elimizdiń sanitarlyq-epidemiologiialyq ahýaly men áleýmettik-ekonomikalyq damýynyń ózekti máseleleri jaiynda esep berdi.
Bul týraly Aqordanyń resmi saity habarlady.
Úkimet basshysy respýblikadaǵy sanitarlyq-epidemiologiialyq ahýal baqylaýda ekenin, kúndelikti jańadan indetke shaldyqqandardyń sany 0,4 paiyzǵa ósip otyrǵanyn, elimiz boiynsha koronavirýstyń órshý deńgeiiniń kórsetkishi 0,9 paiyzdy quraitynyn aitty. Juqpaly aýrýlar aýrýhanalarynyń 28 paiyzynda, jansaqtaý bólimderiniń 20 paiyzynda adamdar emdelip jatyr. Qazirgi ýaqytta COVID-19 indetiniń taralý qarqyny boiynsha Atyraý oblysy «qyzyl aimaqta», Qostanai, Aqmola, Pavlodar jáne Soltústik Qazaqstan oblystary «sary aimaqta», qalǵan óńirlerdiń barlyǵy «jasyl aimaqta» tur.
Biylǵy 19 jeltoqsanda otandyq QazCovid-in vaktsinasyn klinikalyq synaqtan ótkizýdiń sońǵy III satysy bastaldy. Onyń sheńberinde 3 myń erikti azamatqa ekpe egilýde.
2021 jyly naýryz aiynda Jambyl oblysy Qordai aýdanynda jylyna qýaty 60 million mólsherde vaktsina shyǵarýǵa jetetin biofarmatsevtikalyq zaýyt paidalanýǵa beriledi. Sonymen birge Qaraǵandy qalasynda reseilik «Spýtnik V» vaktsinasyn shyǵarý óndirisin iske qosýǵa daiyndyq jumystary júrip jatyr.
Memleket basshysyna investitsiia tartý, óńirlerdi damytý jobalaryn júzege asyrý, halyqty jumyspen qamtý jáne elimizdiń áleýmettik-ekonomikalyq damýynyń ózge de ózekti máseleleri jóninde baiandaldy.
