Qazaqstan Prezidenti Qasym-Jomart Toqaev Túrkistan oblysy Maqtaaral aýdanyndaǵy tótenshe jaǵdaiǵa bailanysty pikir bildirdi, dep habarlaidy "Ult aqparat".
«Ózbekstandaǵy sý qoimasy bógetiniń buzylý saldarynan Túrkistan obl. Jeńis jáne Jańa turmys aýyldaryn sý basty. Búgin PM Asqar Mamin men oblys ákimi Ómirzaq Shókeev aýyl turǵyndaryn evakýatsiialaý boiynsha qabyldanǵan sharalar týraly baiandady. Zardap shekken otbasylarǵa kómek kórsetýdi tapsyrdym», - dep jazady Memleket basshysy Twitter paraqshasynda.
Esterińizge sala keteiik, 1 mamyrda Sardoba sý qoimasy bógetin sý shaiyp ketýine bailanysty Ózbekstannyń Syrdariia oblysyndaǵy eldimekendi sý basty.
Sonyń saldarynan Maqtaaral aýdanynda shekara mańyndaǵy birneshe kollektor sýǵa tolyp qalǵan. Maqtaaraldaǵy ortalyq kollektordan sý tógilip, Jeńis, Jańa turmys aýyldaryn sý alyp ketti. Oblystyq mańyzy bar «Myrzakent - Jeńis - Jańa turmys» avtomobil jolyn sý basyp, kólik júre almaýda. Tórt aýyldan 5400 adam qaýipsiz jerge kóshirilgen.
Sondai-aq Túrkistan oblysynda sý tasqyny qaýpi tóngen 3 aýyldyń halqy evakýatsiialanyp jatyr. Oblys ákimi Ómirzaq Shókeev halyqty sabyrǵa shaqyryp, tótenshe jaǵdaidy retteýge aimaqtyń tolyq múmkindigi bar ekenin aitty.
